Հայաստանը ռուսաստանցիների շրջանում գաստրոտուրիզմի ամենահայտնի ուղղությունների հնգյակում է

ԵՐԵՎԱՆ, 31 հոկտեմբերի. /Նովոստի–Արմենիա/. Հայաստանը ռուսաստանցիների շրջանում գաստրոնոմիկ տուրիզմի ամենահայտնի աշնանային ուղղություններից մեկն է` ըստ RoomGuru.ru հյուրանոցների որոնողական համակարգի տվյալների։

Վարկանիշը կազմվել է 2016 թ.–ի սեպտեմբերի 1–ից նոյեմբերի 30–ին գաստրոնոմիկ փառատոնների անցկացման քաղաքներում լավ խոհանոցով և սնունդով հյուրանոցների որոնման տվյալների հիման վրա։

Ռուս զբոսաշրջիկների շրջանում աշնան ամենահայտնի գաստրոնոմիկ ուղղությունների առաջին հնգյակում են Բելառուսը, Վրաստանը, Ադրբեջանը, Հայաստանն ու Իտալիան։

RoomGuru.ru–ի տվյալներով, լավ խոհանոցով հյուրանոցներ ընտրող զբոսաշրջիկները օթևանելու համար ծախսում են օրական միջինը 4,3 հազար ռուբլի, ինչը 40 տոկոսով ավել է մնացած զբոսաշրջիկներից։

Հայաստանում սեպտեմբերի 12–13–ը Ախթալայում անցկացվել է խորովածի փառատոն, իսկ սեպտեմբերի վերջին և հոկտեմբերի սկզբին` գինու փառատոններ Արենիում և Ռինդում։

Ռուսաստանի քաղաքների առաջին հնգյակում են Մոսկվան, Սանկտ Պետերբուրգը, Վելիկի Նովգորոդը, Սևաստոպոլն ու Նովորոսիյսկը։

RoomGuru.ru–ն (HotelsCombined), World Travel Awards–ի տվյալներով, ճանաչվել է հյուրանոցների լավագույն որոնողական համակարգը վերջին երեք տարվա ընթացքում: -0-