Հայաստանը հայտնվել է անբարենպաստ եղանակային պայմաններում

ԵՐԵՎԱՆ, 11 հուլիսի. /Նովոստի-Արմենիա/. Նախօրեին Երևանում և հանրապետության մի շարք մարզերում ուժեղ քամին` ուղեկցվող հորդառատ անձրևով և կարկուտով, տանիքներ և ծառեր է պոկել:

Ուժեղ քամին գյուղերում

ՀՀ ԱՒՆ-ի հաղորդագրության համաձայն, հորդառատ անձրևի պատճառով անձրևաջրերը լցվել են Կոտայքի մարզի Քանաքեռավան գյուղի 18-րդ փողոցին հարակից տների մեջ: Ուժեղ քամու հետևանքով վնասներ են եղել նաև Աղձք, Ագարակ, Ոսկեվազ, Ոսկեհատ և Օշական գյուղերում: Վնասի չափերը որոշելու համար կկազմվի հանձնաժողով:

Արմավիրի մարզի Լեռնամերձ գյուղի կենտրոնական փողոցում ուժեղ քամուց ծառեր են շրջվել: Դեպքի վայր մեկնած փրկարարները փողոցի երթևեկելի հատվածից հեռացրել են ընկած 3 ուռենի, Արագած փողոցի տներից մեկի նկուղից իրականացրել են ջրահեռացման աշխատանքներ:

Երևանը ևս վնաս է կրել

Նախօրեին ահազանգեր են ստացվել նաև Երևանում: Այդպես, ՀՀ ԱԻՆ ահազանգ է ստացվել, որ Վարդաշենի 8-րդ փողոցի տներից մեկի տան տանիքը պոկվել և ընկել է ավտոճանապարհին: Դեպքի վայր է մեկնած փորկակարները պարզել են, որ տան տանիքի մետաղաթիթեղները և փայտյա կառուցատարրերը պոկվել և ընկել են «Mercedes C200» մակնիշի ավտոմեքենայի վրա:

Բացի այդ, վնասվել են նաև ևս երկու մեքենա: Ռոստովյան փողոցի թիվ 9/10 շինության տանիքը քամուց պոկվել և ընկել է «Toyota Camry» մակնիշի և «Mersedes ML» մակնիշի ավտոմեքենաների վրա: Փրկարարները դեպքի վայրում իրականացրել են հերթապահություն:

Բացի այդ, քամուց վնասվել է Երևանի Ջրաշեն թաղամասի թիվ 107 միջնակարգ դպրոցի տանիքը, իսկ հաստաբուն ծառը պոկվել և ընկել է ճանապարհի երթևեկելի հատված: Ուժեղ քամին պոկել է նաև Խաղաղ Դոնի փողոցում գտնվող մանկապարտեզի տանիքը: Դեպքի վայր ժամանած փրկարարները երկաթյա թիթեղը հեռացրել են ճանապարհի երթևեկելի հատվածից:

Նոր Արեշի 2-րդ փողոցի տներից մեկի տանիքը պոկվել և ընկել է հարևան տան դիմաց: Փրկարարները հեռացրել են տան տանիքի փայտյա կառուցատարերը (մոտ 50 քմ) և բացել տան մուտքը:

Ինչպես հաղորդում է shamshyan.com կայքը, Վերին Անտառային փողոցում՝ Շառլ Ազնավուրի կեցավայրի դիմաց, նշված շենքի հարևանությամբ գտնվող տանիքը քամու հետևանքով պոկվել և շպրտվել է ցած` փակելով ճանապարհի ոչ միայն երթևեկելի, այլ նաև հետիոտնային հատվածը:



Իշխանությունների արձագանքը

Ինչպես հայտնում է ՀՀ Տարածքային կառավարման և զարգացման նախարարությունը, կիրակի տեղացած հորդառատ անձրևի և կարկուտի հետևանքով տուժել են Արմավիրի շուրջ 15 համայնքներ: ՀՀ տարածքային կառավարման և զարգացման նախարար Դավիթ Լոքյանն ուշ երեկոյան մեկնել է Արմավիրի մարզ:
Արմավիրի մարզպետ Աշոտ Ղահրամանյանի հետ նախարարը եղել է Ակնալիճ և Մայիսյան համայնքներում:

Տարածք է այցելել նաև ՀՀ վարչապետ Հովիկ Աբրահամյանը: Տեղացած կարկուտի պատճառած վնասներին տեղում ծանոթանալուց հետո քննարկվել են ձեռնարկվելիք միջոցառումները:

Սա դեռ վերջը չէ...

Երկուշաբթի առավոտյան Երևանում կրկին տեղացել է հորդառատ անձրև` ուղեկցվող կարկուտով և քամու ուժեղացմամբ: Օդի ջերմաստիճանը երկուշաբթի առավոտյան նվազել է մի քանի աստիճանով: Օդերևութաբանների կանխատեսումով` նման անկայուն եղանակը կպահպանվի նաև առաջիկա երկու օրերին: -0-