Հայաստանում կավելացվի դատապարտյալների և կալանավորվածների տեսակցությունների քանակն ու տևողությունը
ԵՐԵՎԱՆ, 16 դեկտեմբերի. /Նովոստի–Արմենիա/. ՀՀ խորհրդարանը չորեքշաբթի արտահերթ նիստի ժամանակ առաջին ընթերցմամբ ընդունել է «Ձերբակալված և կալանավորված անձանց պահելու մասին» օրենքում նախատեսված փոփոխություններն ու լրացումները, հաղորդում է «ԱՌԿԱ» գործակալությունը։
Ինչպես նշել է ՀՀ արդարադատության փոխնախարար Արման Թաթոյանը, օրինագիծն ուղղված է իրավաբանական օգնության համապատասխան իրավունքների (որոնք երաշխավորված են Սահմանադրությամբ և միջազգային պայմանագրերով) ապահովմանը ձերբակալված և կալանավորված անձանց համար։
«Փոփոխություններով առաջարկվում է աշխատանքային և հանգստյան օրերին չսահմանափակել փաստաբանների կամ իրավաբանների հետ ձերբակալվածների կամ կալանավորվածների հանդիպումների հնարավորությունը։ Միաժամանան չեն սահմանափակվի նաև նման տեսակցությունների քանակն ու տևողությունը», – ասել է Թաթոյանը։
Նրա խոսքով` օրինագծով նաև նախատեսվում է ավելացնել հարազատների հետ տեսակցությունների թիվը ցմահ դատապարտյալների և այն անձանց համար, ովքեր դատապարտված են առանձնապես ծանր հանցագործություն կատարելու համար։
Ինչպես նշել է փոխնախարարը, փոփոխություններով նախատեսվում է առանձնապես ծանր հանցագործության համար որոշակի ժամանակահատվածով կամ ցմահ դատապարտված անձանց տասը տարին լրանալուց հետո տրամադրել ամենաքիչը վեց կարճատև և երկու երկարատև տեսակցության հնարավորություն։ –0–
