ԵՐԵՎԱՆ, 12 հունիսի. /Նովոստի–Արմենիա/. Աշխարհահռչակ ֆրանսահայ շանսոնյե Շառլ Ազնավուրը հյուրընկալվել է Le Club de Richard Findykian ռադիոհաղորդաշարին, որի ընթացքում ներկայացրել է Հայաստան կատարած վերջին այցի մանրամասները:
Նա նաև ասել է, որ կցանկանար, որ իր հեղինակած «Pour toi Arménie» հանրահայտ ու սիրված երգը դառնա Հայաստանի նոր օրհներգը:
Շառլ Ազնավուրն իր կեցավայր-թանգարանի այցելուներին անձամբ կպատմի իր կյանքի պատմությունը>>
«Ես կարծում եմ, որ «Pour toi Arménie» երգը կարող է դառնալ Հայաստանի օրհներգը, քանի որ ներկայիս օրհներգն առանձնապես բան չի հաղորդում: Նախագահ Սերժ Սարգսյանն ու, ոչ միայն նա, հավանություն է տվել այդ գաղափարին»,- ասել է Ազնավուրը:
Շանսոնյեն ռադիոհաղորդման ընթացքում պատմել է Հայաստան կատարած այցի ընթացքում իր որդու՝ Նիկոլայի մկրտության մասին:
Հպարտ եմ, որ որդիս որոշեց մկրտվել Հայաստանում. Ազնավուրը` Տաթևից (ԼՈՒՍԱՆԿԱՐ)>>
«Իմ բոլոր երեխաները հայկական եկեղեցում են մկրտվել, Նիկոլան բացառություն չէր: Նիկոլան Հայաստանում մկրտվեց և իմ հոր անունն ընտրեց: Մկրտության ընթացքում ես մտածում էի իմ ծնողների մասին, ընդհանրապես ես նրանց մասին մշտապես մտածում եմ: Շատ հաճախ գիշերը երազումս ծնողներիս եմ տեսնում, հայերը սիրում են երեխաներին և մեծերին»,- ասել է նա:
Ազնավուրը պատմել է նաև ՀՀ նախագահի մասնակցությամբ բացված «Ազնավուր» հիմնադրամի մասին և ընդգծել, որ հիմնադրամի բոլոր հարցերով զբաղվում է որդին` Նիկոլան: Նա նշել է, որ հիմնադրամը զբաղվելու է ամբողջ աշխարհում հայերին օգնություն տրամադրելով:
«Այդ հիմնադրամն օգնելու է ամբողջ աշխարհի հայերին: Հիմնադրամի առաջին նախագիծը թանգարանի հիմնումն է, որը ոչ միայն ինտերակտիվ թանգարան, այլև երիտասարդական կենտրոն, զբոսաշրջային վայր է դառնալու: Հիմնադրամը զբաղվելու է երիտասարդներով, որպեսզի նրանք չհեռանան երկրից, այլ կարողանան իրացնել իրենց կարողությունները հայրենիքում` ընտանիքով շրջապատված»,- պատմել է շանսոնյեն` ընդգծելով, որ սա կարևոր է, քանի որ Հայաստանն այժմ վտանգի մեջ է՝ հաշվի առնելով, որ սահմանակից է Թուրքիային և Ադրբեջանին:-0-