ԱԳՆ. Փարիզի ահաբեկչությունների հետևանքով զոհերի թվում ՀՀ քաղաքացիներ և հայեր չկան

ԵՐԵՎԱՆ, 15 նոյեմբերի. /Նովոստի–Արմենիա/. Փարիզի ահաբեկչությունների հետևանքով զոհերի թվում ՀՀ քաղաքացիներ և հայեր չկան, հաղորդում է ՀՀ արտգործնախարարությունը` հղում անելով Ֆրանսիայի իշխանությունների՝ ՀՀ դեսպանությանը տրամադրած նախնական տեղեկատվությանը։

Փարիզում և նրա արվարձաններից մեկում մի շարք ահաբեկություններ և կրակոցներ էին գրանցվել։ Վերջին տվյալներով` զոհվել է 130 մարդ, ավելի քան 352–ը վիրավոր է, որոնցից 99–ը ծայրահեղ ծանր վիճակում են։

Ահաբեկիչները գրոհներ են կազմակերպել Փարիզի տարբեր կետերում։ Մեծ թվով զոհեր են գրանցվել «Բատակլան» համերգասրահում, որտեղ ահաբեկիչները պատանդ են վերցրել հանդիսատեսին։ Այնտեղ սպանվել է մոտ հարյուր մարդ։ Բացի այդ, մահապարտները պայթյուններ են կազմակերպել «Ստադ դե Ֆրանս» մարզադաշտի մոտակայքում։ Զինված գրոհայինները գնդակահարել են մի քանի սրճարանների և ռեստորանների այցելուների։

Ահաբեկությունների համար պատասխանատվությունը վերցրել է «Իսլամական պետություն» ահաբեկչական խմբավորումը։–0–