Նախորդ շաբաթվա կարևոր նորությունների հնգյակը (սեպտեմբերի 30–ից հոկտեմբերի 4)

10:30

05 Հոկտեմբերի 2019

ԵՐԵՎԱՆ, 5 հոկտեմբերի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (սեպտեմբերի 30–ից հոկտեմբերի 4)։

Հոկտեմբերի 1–ին Երևանում կայացել է Բարձրագույն Եվրասիական տնտեսական խորհրդի նիստը, որին մասնակցել է ՌԴ նախագահ Վլադիմիր Պուտինը։ Նրա այցի շրջանակում կայացել է առանձնազրույց ՀՀ վարչապետ Նիկոլ Փաշինյանի հետ, որի ընթացքում Պուտինը Փաշինյանին պաշտոնական այցով հրավիրել է Ռուսաստան։

Ազգային ժողովը փակ, գաղտնի քվեարկությամբ ընդունել է ՍԴ նախագահ Հրայր Թովմասյանի լիազորությունները դադարեցնելու հարցով ՍԴ դիմելու նախագիծը:

ԶԼՄ–ների հաղորդմամբ, ՌԴ նախագահ Վլադիմիր Պուտինը հայաստանյան այցի ժամանակ հանդիպել է ՀՀ երկրորդ նախագահ Ռոբերտ Քոչարյանի կնոջ` Բելլա Քոչարյանի հետ։

Մարդու իրավունքների եվրոպական դատարանը վարույթ է ընդունել Ռոբերտ Քոչարյանի մասով ՍԴ–ի դիմումը։

ՀՀ ԱԳՆ–ն արձագանքել է Ադրբեջանի նախագահ Իլհամ Ալիևի հայտարարությանը, որը նա արել է նախօրեին Սոչիում` «Վալդայ» համաժողովի ժամանակ։ Ալիևը «Վալդայ» համաժողովի նիստի ժամանակ պատասխանել է ավելի վաղ ՀՀ վարչապետ Նիկոլ Փաշինյանի առաջարկած բանաձևին այն մասին, որ ղարաբաղյան հակամարտության կարգավորումը պետք է ընդունելի լինի Հայաստանի, Ադրբեջանի և Արցախի ժողովուրդների համար։ Ալիևը հայտարարել է, որ «Ղարաբաղն ադրբեջանական տարածք է։ Այնպես որ Ղարաբաղն Ադրբեջան է և բացականչական նշան»։ Նրա խոսքով, ««Լեռնային Ղարաբաղի ժողովուրդ» հասկացություն գոյություն չունի, կա Լեռնային Ղարաբաղի բնակչություն, որը մինչև հակամարտություն բաղկացած էր ադրբեջանական և հայկական բնակչությունից, որն ուներ հավասար իրավունքներ»։–0–

Ծանոթացեք լուրերին առաջինն ու քննարկեք դրանք մեր Telegram-յան ալիքում

#նախորդ շաբաթ #կարևոր նորություններ #հնգյակ

Թեմատիկ նյութեր