Հետահայաց ամառ. ամենաաղմկոտ իրադարձությունները Հայաստանում

ԵՐԵՎԱՆ, 3 սեպտեմբերի. /Նովոստի-Արմենիա/. Այն հարցին, թե ինչպես անցավ ամառը, Հայաստանի բնակիչները, ամենայն հավանականությամբ, կպատասխանեն` «շատ շոգ էր»: Եվ դա զարմանալի չէ, քանի որ այս տարի արտասովոր շոգի հետևանքով Երևանում տասնամյա ռեկորդ սահմանվեց` օգոստոսին օդի ջերմաստիճանը գիշերը մայրաքաղաքում հասավ 32 աստիճան տաքության:

«Նովոստի-Արմենիա» գործակալությունը որոշեց հիշել, թե ինչով կհիշվի ավարտված ամառը Հայաստանում:

Մեծ հաղթանակներ

«Ռիո 2016»-ի չեմպիոն, աշխարհի կրկնակի չեմպիոն, հունահռոմեական ըմբիշ Արթուր Ալեքսանյանն օգոստոսին դարձավ աշխարհի առաջնության հաղթող Փարիզում:


98 կգ քաշային կարգում Արթուր Ալեքսանյանը հաղթեց ռուս Մուսա Եվլոևին: Մենամարտն ավարտվեց 3:1 հաշվով:

Եվս մեկ ոսկե մեդալ բերեց հունահռոմեական ոճի ըմբիշ Մաքսիմ Մանուկյանը, ով եզրափակչում 5:0 հաշվով հաղթեց բելառուս Ռադիկ Կուլիևին՝ իր կարիերայում առաջին անգամ դառնալով աշխարհի չեմպիոն:


Դրանով հայերի մարզական նվաճումները չավարտվեցին` Թայվանում անցկացված 29-րդ Ունիվերսիադայում Հայաստանի հավաքականը նվաճեց վեց մեդալ, որոնցից երեքը` ոսկե, մեկ` արծաթե և երկու` բրոնզե:

Հայ գրոսմայստեր Լևոն Արոնյանն օգոստոսին դարձավ Grand Chess Tour արագ շախմատի չորրորդ փուլի հաղթող: Արոնյանն առաջ է անցել մրցակիցներից 24,5 միավորով:


Այրվող Հայաստան

2017-ի ամառն աննախադեպ էր Հայաստանում գրանցված խոշոր հրդեհների թվով: Վայոց Ձորում բռնկված անտառային հրդեհների մասին ահազանգը ստացվեց օգոստոսի 10-ին: Սկզբում բռնկվեցին Արտավան գյուղի հարակից կանաչ տարածքները, այնուհետև կրակը տարածվեց Սարավանի անտառատնտեսությունների վրա: Հրդեհը հնարավոր եղավ տեղյնացնել միայն հինգ օր անց` օգոստոսի 15-ին, իսկ օգոստոսի 16-ի առավոտյան հրդեհը մարվեց:

Օգոստոսի 12-ին հրդեհներ բռնկվեցին Խոսրովի արգելոցում, որտեղ այրվում էին «Զիմնի» հատվածի անտառային զանգվածները և հարակից տարածքների խոտածածկույթը: Հրդեհաշիջման աշխատանքներում ներգրավված էին հրշեջներ, փրկարարներ, բանակային և ոստիկանական ուժեր, ինչպես նաև ռուսական ԻԼ-76 ամենամեծ հրշեջ ինքնաթիռը: Հրդեհը, որը տարածվել էր 16 կմ տարածքում, հաջողվեց մարել 6 օր անց:


Սակայն հայ հրշեջների հանգիստը կարճ տևեց` օգոստոսի 28-ին հայտնի դարձավ հայկական «Նաիրիտ» քիմգործարանում պայթյունի և դրան հետևած հրդեհի մասին: Հրդեհաշիջման աշխատանքներում ներգրավվեցին մեծ թվով հրշեջներ և հատուկ տեխնիկա: Ավելի ուշ հայտնի դարձավ, որ գործարանի տարածքում այրվել են լաքէթինոլով բաքեր:


Նաև ողբերգություններ

Օգոստոսի սկզբում Հայաստանի մարզերից մեկում զանգվածային հրաձգություն տեղի ունեցավ: Արագածոտնի մարզի Շամիրամ գյուղի սգո արարողությունների սրահ ներխուժեց անհայտ անձը և կրակ բացեց ներկա գտնվողների վրա: Հրաձգության հետևանքով 11 մարդ հրազենային վնասվածք ստացավ, նրանցից երեքը տեղում մահացան, մյուսը` հիվանդանոցում:

Օգոստոսի 25-ի լույս գիշերը ձերբակալվեց հանցագործության գլխավոր կասկածյալ Թելման Քալաշյանը:

Եվս մի սարսափելի միջադեպ կատարվեց օգոստոսի 29-ին` Էրեբունի վարչական շրջանի «Weekend» խաղատանը 31-ամյա Գոռ Հակոբյանը, դանակով զինված, պատանդ է վերցրել Երևանի 24-ամյա բնակչուհու:

Տղամարդը բազմաթիվ ներկաների և իրավապահ մարմինների աշխատակիցների ներկայությամբ սպառնում էր, որ կսպանի աղջկան:

Հակոբյանի հետ բանակցություններն արդյունք չտվեցին` նա հրաժարվում էր կատարել իրավապահների պահանջները: Կնոջ ազատելու համար ոստիկանները ստիպված եղան գնալ ծայրահեղ քայլերի: Կատարված հատուկ օպերացիայի հետևանքով Հակոբյանը կյանքի հետ անհամատեղելի հրազենային վերք ստացավ: Տուժածը ներկայում գտնվում է հիվանդանոցում, վիճակը կայուն է:

Հայաստանյան ամառը բնակիչներին և հյուրերին ուրախացրեց նաև բազմաթիվ փառատոներով և այլ միջոցառումներով: Մայրաքաղաքում անցկացվեցին ավանդական «Ոսկե ծիրան» և Fresco կինոփառատոները, «Երևան տարազ ֆեստը», գարեջրի, հատապտուղների և մեղրի փառատոները և այլն:


Այս տարի Հայաստանում առաջին անգամ կայացավ «Միսս ԱՊՀ» գեղեցկության միջազգային մրցույթի եզրափակիչը, որում հետխորհրդային երկրների գլխավոր գեղեցկուհու տիտղոսը շնորհվեց հայուհի Շուշան Երիցյանին: -0-