ԵՐԵՎԱՆ, 11 հուլիսի./Նովոստի–Արմենիա/. Հայաստանում օրերս կառավարությունը հավանություն է տվել Հիսուս Քրիստոսի 33 մետրանոց արձանի տեղադրման նախագծին, որը նախաձեռնել է խոշոր ձեռներեց, նախկին պատգամավոր Գագիկ Ծառուկյանը։ Սակայն ՀՀ կրթության, գիտության, մշակույթի և սպորտի նախարարությունն անսպասելիորեն պահանջել է դադարեցնել նախագծի իրականացումը։
Ամենաբարձր արձանը
Ծառուկյանը Քրիստոսի արձանը տեղադրելու մտադրության մասին հայտարարել էր 2022թ.–ի հունվարին։ Այնուհետև հայտարարվել էր մրցույթ և ներկայացված ավելի քան 300 աշխատանքներից ընտրվեցին 12 լավագույնները, արդյունքում հաղթող ճանաչվեց քանդակագործ Արմեն Սամվելյանի նախագիծը։
Հուլիսի 9–ին Կոտայքի մարզում` Հատիս լեռան վրա, տեղի ունեցավ հիմնարկեքի արարողությունը և տրվեց Հիսուս Քրիստոսի մոնումենտալ արձան-համալիրի շինարարական աշխատանքների մեկնարկը։
Նախատեսվում է, որ այն կլինի Քրիստոսին նվիրված ամենաբարձր արձանը, նրա ընդհանուր բարձրությունը, պատվանդանի հետ միասին, կկազմի 77 մետր։ Կբացվի նաև թանգարան, ճոպանուղի, կգործեն քոթեջներ և սրճարան, զբոսաշրջիկների ներգրավման համար նախատեսված այլ ենթակառուցվածքային օբյեկտներ։
ԿԳՄՍՆ–ի պահանջը
Նախօրեին ԿԳՄՍՆ–ն հանդես եկավ հայտարարությամբ, որում կտրուկ կերպով պահանջեց դադարեցնել ցանկացած գործունեություն հնավայր-ամրոցի տարածքում, որտեղ գտնվում են տարբեր դարաշրջանների շուրջ 20 պատմամշակութային հուշարձաններ։ Դրանք բոլորը ներառված են պետության պահպանության տակ գտնվող օբյեկտների ցանկում։
Այսպես, դեռևս 2019 թ–ին հայ-իտալական հնագիտական արշավախմբի ուսումնասիրությունների արդյունքում Հատիս լեռան գագաթին նախնական տվյալներով առկա է բրոնզ-երկաթեդարյան հնավայր-ամրոց /նորահայտ օբյեկտ/, որի պարիսպները շատ լավ տեսանելի են օդային լուսանկարներից: Նախարարությունից նաև նշել են, որ անգամ եթե նորահայտ օբյեկտը դեռ ընդգրկված չէ հուշարձանների պետական ցուցակում, ակնհայտ է, որ այն հնավայր-ամրոց է, և դրա մոտակայքում իրականացվող ցանկացած շինարարական աշխատանքներ արգելված են օրենքով:
Հայտարարության մեջ նաև նշվում է, որ ՀՀ ԿԳՄՍ նախարարությունը, ընդունելի համարելով «Հիսուս Քրիստոս» մոնումենտալ արձանի գաղափարը, միևնույն ժամանակ իր լիազորությունների և պատասխանատվության սահմաններում մինչ սահմանված կարգով նախագծի ներկայացումը և մասնագիտական ուսումնասիրությունը պահանջում է դադարեցնել ցանկացած գործունեություն հնավայր-ամրոցի տարածքում, որը հակասում է գործող օրենսդրությանը և կարգերին։
«Գագիկ Ծառուկյան» բարեգործական հիմնադրամի արձագանքը
Այսօր «Գագիկ Ծառուկյան» բարեգործական հիմնադրամից արձագանքեցին նախարարության հայտարարությանը։
«Հաշվի առնելով Հատիս լեռան տարածքում պատմության և մշակույթի հուշարձանների առկայության վերաբերյալ մասնագիտական հանրույթի ու հանրային տարբեր շերտերի հնչեցրած մտահոգությունները՝ «Գագիկ Ծառուկյան» բարեգործական հիմնադրամը դիմել է պատկան մարմիններին ստանալու համապատասխան մասնագիտական եզրակացություններն ու թույլտվությունները շինարարական աշխատանքները սկսելու համար», – նշվում է հայտարարության մեջ։
Նշվում է, որ այժմ իրականացվում են բացառապես ենթակառուցվածքների՝ ճանապարհների, էլեկտրականության, գազի, ջրի մատակարարումն ապահովելու ուղղությամբ տարվող որոշակի աշխատանքներ, իսկ Հիսուս Քրիստոսի մոնումենտալ արձանի շինարարությունը մեկնարկելու է պատկան մարմինների դրական եզրակացություններից հետո միայն:
Հասարակության արձագանքը
Հիսուս Քրիստոսի մոնումենտալ արձանի տեղադրման մասին տեղեկությունները հիմնականում արժանացան հասարակության բացասական արձագանքին։ Սոցցանցերի օգատերերը տարակուսած են, որ հետպատերազմական իրավիճակում ավելի շատ ուշադրության է արժանանում այս կոմերցիոն նախագիծը, քան երկրի անվտանգության, սոցիալական խնդիրների հետ կապված հարցերը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
