Փլուզում Երևանում. վարկածներ և պարզաբանումներ դեռևս չկան
ԵՐԵՎԱՆ, 16 մարտի./Նովոստի–Արմենիա/. Չորքեշաբթի, ժամը 04.49-ին ՀՀ ԱԻՆ–ն ահազանգ է ստացել, որ Երևանի Սարալանջի պողոտայում՝ Անտառային փողոցի մոտակայքում, ճանապարհահատվածը փլվել է (մոտ 1 քմ), ինչի հետևանքով երթևեկությունը խափանվել է, անհրաժեշտ է օգնություն:
Երևանի «Սարալանջի» ավտոմայրուղին, որն արժե 6 մլրդ դրամ (19,3 մլն դոլար), շահագործման է հանձնվել 2008 թ.–ի օգոստոսի կեսին։ Մայրուղին բավականին բարդ տրանսպորտային կառույց է, որի նպատակն է բեռնաթափել մայրաքաղաքի կենտրոնի տրանսպորտային երթևեկությունը։ Հարկ է նշել, որ մայրուղին անցնում է ՀՀ նախագահի նստավայրի, ինչպես նաև Գիտությունների ազգային ակամեդիայի շենքերի հետևի մասով։
Դոմինոյի Էֆեկտ
Պարզվել է¸ որ Ազատության պողոտայի թիվ 1/21 շենքի դիմաց մոտ 15մ երկարությամբ և 8մ բարձրությամբ բետոնե հենապատը փլուզվել է և թափված հողազանգվածի հետ փակել Սարալանջի պողոտայի երթևեկելի հատվածը: Տարածքի տեղազննման արդյունքում Ազատության պողոտայի թիվ 1/21 շենքի դիմաց՝ ասֆալտի վրա¸ նկատվել են մոտ 5մ երկարությամբ և մոտ 0¸7 սմ լայնությամբ ճաքեր: Փրկարարները ժապավենով սահմանազատել են շենքի հարակից վտանգավոր հատվածը:
«Նովոստի–Արմենիա» գործակալությունը փորձեց պարզել միջադեպի պատճառը, ինչպես նաև այն հարցը, թե, արդյոք, կսկսվի դատական քննություն այս փաստով, թե ոչ։
ԱԻՆ. վարկածներ չկան
ՀՀ արտակարգ իրավիճակների նախարարության մամուլի ծառայության ներկայացուցիչը «Նովոստի–Արմենիա» գործակալությանը հայտարարեց, որ դեպքի վայր է մեկնել Ճգնաժամային կառավարման ազգային կենտրոնի օպերատիվ խումբն ու ԱԻ արձագանքման խումբը։
«Միջադեպի վարկածներ դեռ չկան։ Պարզ չէ նաև այն հարցը, թե, արդյոք, կսկսի դատական քննություն, թե ոչ», – տեղեկացրեցին մամուլի ծառայությունից։
Քաղաքաշինության նախարարությունը շնորհակալություն հայտնեց ահազանգի համար
ՀՀ քաղաքաշինության նախարարության մամուլի քարտուղար Անահիտ Եսայանն ասաց, որ առաջին անգամ է լսում միջադեպի մասին։
Այդուհանդերձ, նա տեղեկացրեց, որ ահազանգը հաշվի կառնվի։
Քաղաքապետարանը խոստացավ ավելի ուշ տրամադրել տեղեկատվություն
Երևանի քաղաքապետարանի մամուլի ծառայությունը ևս այդ պահին չուներ մանրամասն տեղեկատվություն։ «Վարկածներ դեռ չկան, սակայն մենք հետևում ենք իրավիճակին և տեղեկատվություն կտրամադրենք ԶԼՄ–ներին», – ասաց Երևանի քաղաքապետարանի մամուլի ծառայության ներկայացուցիչը։
«Նովոստի–Արմենիա» գործակալությունը շարունակում է հետևել փլուզման շուրջ ստեղծված իրավիճակին, որի հետևանքով, բարեբախտաբար, զոհեր չեն գրանցվել։ –0–
