ԵՐԵՎԱՆ, 10 հոկտեմբերի. /Նովոստի–Արմենիա/. Սերբիայի ֆուտբոլի հավաքականի և Լոնդոնի «Չելսիի» ավագ Բրանիսլավ Իվանովիչը կարծում է, որ Հայաստանի հավաքականի հետ վաղվա խաղը Եվրոպայի 2016թ. առաջնության ընտրական փուլի շրջանակում ծանր և կոշտ կլինի:
Հանդիպումը տեղի կունենա հոկտեմբերի 11-ին` տեղական ժամանակով ժամը 20:00-ին Երևանի Հանրապետական մարզադաշտում:
«Ես գիտեմ, որ Հայաստանի հավաքականի կազմում չեն խաղա մի քանի առանցքային ֆուտբոլիստներ, սակայն դա որևէ նշանակություն չունի, քանի որ հայկական թիմը կանի հնարավոր ամեն բան` հաջողության հասնելու համար: Մենք մեր հերթին կանենք ամեն բան, որպեսզի Սերբիա վերադառնանք երեք միավորով», - ասաց սերբերի ավագը:
Նա նշեց, որ գիտե, թե որքան ծանր է հայ ֆուտբոլիստների հետ խաղալը Հանրապետական մարզադաշտում:
Սերբիայի հավաքականը յոթ տարի առաջ խաղացել է Հայաստանի հետ ԵՎՐՈ-2008-ի շրջանակում, հանդիպումն ավարտվել է 0-0 հաշվով: Բրանիսլավ Իվանովիը մասնակցել է այդ խաղին:
Խոսելով իր ֆիզիկական վիճակի մասին` Իվանովիչը նշեց, որ հավաքից առաջ փոքր վնասվածք է ստացել, ինչի պատճառով հավաքականում մեկ մարզում բաց է թողել:
«Վաղվա խաղին ես լիովին պատրաստ կլինեմ», - ասաց Իվանովիչը:
Պատասխանելով սերբ լրագրողի հարցին, թե մտադի՞ր են ինքը կամ «Չելսիի» մեկ այլ խաղացող` Նեմանյա Մատիչը ուժերը խնայել առաջիկա խաղում` հաշվի առնելով անգլիական Բարձրագույն լիգայի ծանր ժամանակացույցը, Իվանովիչը նշեց, որ իրենք խաղալու են ամբողջ ուժով:
«Մեզ համար հավաքականում հանդես գալը միշտ մեծ պատիվ է», - ասաց սերբական հավաքականի ավագը:
Նա նշեց նաև, որ խմբից դուրս գալու հնարավորություններ ունեն բոլոր թիմերը: «Եթե մենք ցանկանում ենք հասնել եզրափակիչ փուլ, ապա պետք է սկսենք հաղթանակով և շարունակենք նույն ոգով մտակա երկու տարում», - ասաց Իվանովիչը:
Հայաստանի հավաքականը նույն ընտրական խմբում է Դանիայի, Պորտուգալիայի, Ալբանիայի և Սերբիայի հետ: Ընտրական խմբի առաջին խաղում սեպտեմբեր 7-ին հայ ֆուտբոլիստները զիջեցին դանիացիներին 2:1 հաշվով:--0-
