Մարզական սկանդալ․ Հայաստանի ազգային հավաքականի գեղասահորդները չեն մասնակցի Եվրոպայի առաջնությանը Մեծ Բրիտանիայի դեսպանատան կողմից վիզա չստանալու պատճառով
ԵՐԵՎԱՆ, 14 հունվարի․/Նովոստի–Արմենիա/․ Հայաստանի ազգային հավաքականի գեղասահորդները չեն մասնակցի Գեղասահքի Եվրոպայի առաջնությանը Մեծ Բրիտանիայի դեսպանատան կողմից վիզա չստանալու պատճառով։
Այս մասին հայտնում է ՀՀ գեղասահքի ֆեդերացիան։
«Խորին ափսոսանքով տեղեկացնում ենք, որ Հայաստանի ազգային հավաքականի գեղասահորդներ Սիմոն Դանիլյանցը և սպորտային զույգ Կարինա Ակոպովա / Նիկիտա Ռախմանին զույգը չեն մասնակցի Գեղասահքի Եվրոպայի Առաջնությանը՝ 2025-2026 մրցաշրջանի ամենակարևոր մրցաշարերից մեկին», – նշվում է ֆեդերացիայի հայտարարության մեջ։
Ֆեդերացիայից նաև հայտնում են, որ չնայած բոլոր անհրաժեշտ փաստաթղթերի ժամանակին ներկայացմանը, Մեծ Բրիտանիայի դեսպանատունը մեր մարզիկներին չի տրամադրել մուտքի վիզաները սահմանված ժամկետներում, ինչի արդյունքում մեր հավաքական թիմը զրկվել է Եվրոպայի առաջնությանը մասնակցելու հնարավորությունից։
«Սա լուրջ հարված է մեր մարզիկների ամբողջ սեզոնային պատրաստությանը, մրցակցային զարգացմանը և միջազգային վարկանիշային դիրքերին։ Տարիների քրտնաջան աշխատանքը, պատրաստվածությունն ու նվիրումը չպետք է կախված լինեն վարչական ձգձգումներից։ Հայաստանի Գեղասահքի Ֆեդերացիան անում է ամեն ինչ նման իրավիճակների կրկնությունը կանխելու և մեր մարզիկների իրավունքները պաշտպանելու համար։ Շնորհակալ ենք բոլոր նրանց, ովքեր աջակցում են մեր թիմին այս բարդ պահին։ Մենք շարունակելու ենք մեր պայքարը՝ հանուն հայկական գեղասահքի արժանապատիվ ներկայության միջազգային ասպարեզում», – նշվում է ֆեդերացիայի հայտարարության մեջ։
