Եվրոպայի առաջնությունը բարդ էր, սակայն հայ շախմատիստները լավ խաղ ցուցադրեցին. Լպուտյան

ԵՐԵՎԱՆ, 25 նոյեմբերի. /Նովոստի–Արմենիա/. Եվրոպայի շախմատի թիմային առաջնությունը բավականին բարդ էր Հայաստանի հավաքականի համար, սակայն շախմատիստներին հաջողվեց հավաքվել և հիանալի խաղ ցուցադրել վերջին հանդիպումներում, հայտարարեց Հայաստանի շախմատի ֆեդերացիայի փոխնախագահ Սմբատ Լպուտյանը։

«Իրականում ցանկացած մրցաշար կապված է կոշտ մրցակցության և պայքարի հետ։ Այս մրցաշարը ևս բավականին բարդ էր մեր հավաքականի համար։ Սկզբում մեր տղաները թույլ տվեցին վրիպումներ, նրանց խաղն այդքան էլ լավ չէր ստացվում, սակայն ինչպես աշխարհի առաջնության ժամանակ, այնպես էլ հիմա մերոնք կարողացան վերջում հիանալի խաղ ցուցադրել», – չորեքշաբթի լրագրողներին ասաց Լպուտյանը։

Գրոսմայստերի խոսքով` վերջին խաղերում զգացվում էր համախմբվածություն, նպատակասլացություն և պայքարելու մեծ ցանկություն, որը մեծ հաղթանակների է հանգեցնում։

Լպուտյանն ավելացրեց, որ անկախացումից հետո վերջին 23 տարիների ընթացքում Հայաստանի շախմատի հավաքականն առանցքային մրցաշարերում նվաճած մեդալների թվով զբաղեցնում է երկրորդ տեղն աշխարհում ։

«Հայաստանը տարբեր խոշոր մրցաշարերում ընդհանուր առմամբ նվաճել է 15 մեդալ, որոնցից հինգը ոսկի են, 2–ը` արծաթե և 8–ը` բրոնզե», – նշեց նա։

Փորձագետի խոսքով` միանձնյա առաջատարը Ռուսաստանն է` 23 մեդալով, երրորղ տեղում Ուկրաինան է` 13 մեդալով։ «Սրանք աշխարհի երեք ուժեղագույն թիմերն են, որոնցից մեկը Հայաստանն է», – նշեց Լպուտյանը։  

Գրոսմայստեր Սմբատ Լպուտյանը Հայաստանի քառակի չեմպիոն է, Շախմատի համաշխարհային օլիմպիադայի հաղթող (Թուրին, 2006 թ.) ։

Հայաստանի հավաքականը դարձել է Եվրոպայի շախմատի թիմային առաջնության արծաթե մեդալակիր։

Եվրոպայի թիմային առաջնությունն անցկացվել է Ռեյկյավիկում նոյեմբերի 12–22–ը։ Տղամարդկանց և կանանց մրցաշարերն անցկացվել են շվեյցարական համակարգով, 9 տուրով։ Երկու առաջնություններում էլ հաղթել են Ռուսաստանի հավաքականները։

Հայաստանի թիմում ներառվել են Լևոն Արոնյանը, Գաբրիել Սարգսյանը, Սերգեյ Մովսիսյանը, Հրանտ Մելքումյանն ու պահեստային խաղացող Կարեն Գ. Գրիգորյանը։ –0–