Դեպրեսիան կարելի է բուժել կարմիր գինու օգնությամբ

ԵՐԵՎԱՆ, 2 օգոստոսի. /Նովոստի–Արմենիա/. Կարմիր գինին կարող է օգնել ազատվել մի շարք տկարություններից։

Կարմիր գինում պարունակվող ռեսվերատրոլն ընդունակ է ազատել դեպրեսիայից և տագնապի զգացումից։ Այսպիսի եզրակացության են եկել ԱՄՆ–ի Բուֆալո համալսարանի գիտնականները, գրում է vokrugsveta.ru–ն։

Ռեսվերատրոլը բնական հակաօքսիդանտ է, որը պարունակվում է խաղողի կեղևում։ Մասնագետները մի շարք գիտափորձեր են կատարել լաբորատոր մկների վրա` կրծողներին ստիպել են վերապրել սթրեսը, որի արդյունքում դեպրեսիա է զարգացել։ Այդ ժամանակ գիտնականները կենդանիների կերի մեջ ռեսվերատրոլ են ավելացրել։ Նյութը սկսել է ճնշել ուղեղում առաջացած և վատ տրամադրության աղբյուր հանդիսացող PDE4 ֆերմենտը։
Արդյունքում մկների հոգեկան վիճակը բարելավվել է։


Միակ բացասական կողմը, ըստ մասնագետների, նյութի ճիշտ դոզավորումն է։ Օրինակ, 70 կգ քաշով մարդուն կպահանջվի 700 մգ ռեսվորատրոլ, դա նշանակում է, որ մեկ անգամից նա պետք է խմի մոտ 350 գավաթ կարմիր գինի (գինու մեկ չափաբաժինը պարունակում է մոտ 2 մգ բուժիչ նյութ): Այս քանակի գինին կհանգեցնի մահվան։ Այնուամենայնիվ, անցկացված հետազոտությունն օգտակար է դեղագործների համար։

Գիտնականներն ասում են, որ դեպրեսիայի դեմ ժամանակակից դեղամիջոցներն ուղղված են գլխուղեղում սերոտոնինի և նորադրենալինի ֆունկցիաների փոփոխությանը, այլ ոչ թե կործանարար ֆերմենտների արգելակմանը և արդյունավետ են միայն պացիենտների մեկ երրորդի համար։ -0-