Հոգևորականները տարակուսանք են հայտնում Երևանի փողոցի անվանափոխության մասին քաղաքապետարանի որոշման կապակցությամբ
ԵՐԵՎԱՆ, 22 մայիսի. /Նովոստի-Արմենիա/. Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը ողջունել է Երևանի քաղաքապետարանի որոշումը` մայրաքաղաքի փողոցներից մեկի անվանափոխության վերաբերյալ, սակայն միաժամանակ տարակուսանք է հայտնել:
«Ողջունում ենք Երևանի քաղաքապետարանի կայացրած որոշումը՝ Գրիգոր Լուսավորչի փողոցը Սբ Գրիգոր Լուսավորիչ վերանվանելու վերաբերյալ, բայց և տարակուսում, թե ինչպե՞ս է որոշվել Լուսավորչի առաջնահերթությունը Մաշտոցի համեմատ», - գրել է նա Facebook-ի իր էջում:
«Տարակուսանքի մեջ մնացինք նաև ազգային-հոգեւոր արժեքների վերաբերյալ քաղաքական ուժերի քննարկումներում հնչող լեզվաբանության առթիվ:
Սիրենք մեր Հայրենին և միշտ հավատարիմ մնանք մեր նախնյաց սրբազան ժառանգությանը», - ավելացրել է նա:
Երևանի Ավագանին չորեքշաբթի նիստին լարված մթնոլորտում քննարկեց «Լույս» խմբակցության նախաձեռնությունը` ներառել «սուրբ» ածականը Երևանի որոշ կենտրոնական փողոցների անվանումներում, որոնք կրում են հայտնի հայ սրբերի անունները:
Մասնավորապես, «սուրբ» բառն առաջարկվում էր ավելացնել Մեսրոպ Մաշտոցի պողոտայի, Գրիգոր Լուսավորիչ և Մովսես Խորենացի փողոցների անվանումներում: Քննարկման արդյունքում, Ավագանին որոշեց ավելացնել «սուրբ» բառը միայն Գրիգոր Լուսավորիչ փողոցի անվանմանը:-0-
