ԵՐԵՎԱՆ, 23 ապրիլի. /Նովոստի-Արմենիա/. Հայաստանում օն-լայն ռադիոյի զարգացման համար լավ նախադրյալներ կան, ասվում է տեղեկատվական անվտանգության փորձագետ Սամվել Մարտիրոսյանի` media.am կայքում հրապարակված հոդվածում։
Ըստ նրա` ակնհայտ է, որ Հայաստանն ընթանում է կոնվերգենտ մամուլի ուղղությամբ, որը միավորում է բոլոր տեսակի մեդիաները, իսկ մյուս կողմից` մամուլի զարգացման վրա ազդում են տարբեր գործոններ, օրինակ, բջջային սարքավորումների զարգացումը, ինչի արդյունքում մեդիայի տարբեր տեսակները տարբեր արագությամբ են զարգանում։
«Դիտարկելով համաշխարհային զարգացումները՝ կարելի է ենթադրել, թե մեդիայի որ տեսակներն առաջընթաց կապրեն Հայաստանում։ Դրանցից մեկը օնլայն ռադիոն է»,– նշում է Մարտիրոսյանը հոդվածում։
Նա նշել է, որ այսօրվա դրությամբ օն-լայն ռադիոն իրենից նոր տեսակի ռադիո է ներկայացնում, որը բավականին արագ է զարգանում։
Օրինակ, ԱՄՆ–ում վերջին երկու տարիներին զգալիորեն աճել է սմարթֆոններով և պլանշետներով առցանց ռադիո օգտագործողների թիվը, և ինչպես ցույց են տալիս հետազոտությունները, ամեն երրորդ ամերիկացի օնլայն ռադիո է լսում։
«Կարծում եմ` մենք էլ դրա նախադրյալներն ունենք, քանի որ Հայաստանում կտրուկ աճել է բջջային սարքերի թիվը, ինչպես նաև վերջին տարվա ընթացքում շոշափելիորեն նվազել է բջջային ինտերնետ կապի գինը»,– նշեց Մարտիրոսյանը։
Ինչպես կարծում է փորձագետը, ինտերնետ ծառայությունների արժեքն էլ ավելի կնվազի բջջային համարի տեղափոխելիության (MNP) ծառայության գործարկմանը զուգընթաց, քանի որ բջջային կապի օպերատորների միջև մրցակցությունը կմեծանա։
«Կազդեն նաև սուբյեկտիվ գործոնները։ Օրինակ, եթե մի քանի տարի առաջ հասարակական տրանսպորտի վարորդները երեկոյան ժամերին լուրեր էին լսում ռադիոյով, ապա այսօր վերածնվում է «ռաբիս» երաժշտությունը, ինչի պատճառով շատերը ստիպված են դիմել իրենց հեռախոսներին տեղեկություն ստանալու համար։ Այսպիսով, լրատվական բիզնեսի համար շատ հետաքրքիր դաշտ է ստեղծվում»,– ասաց Մարտիրոսյանը, հաղորդում է telecom.arka.am հեռահաղորդակցային պորտալը։ -0-
