ԵՐԵՎԱՆ, 3 ապրիլի. /Նովոստի–Արմենիա/. ՀՀ ԿԳՆ գիտության պետական կոմիտեի նախագահ Սամվել Հարությունյանը հյուրընկալել է Կուբայի գիտությունների ակադեմիայի փոխնախագահ, գիտության հարցերով պետական խորհրդական Ֆիդել Կաստրո Դիազ-Բալարթին և Հայաստանում Կուբայի արտակարգ և լիազոր դեսպան Էմիլիո Լոսադա Գարսիային (նստավայրը՝ Մոսկվա):
Ինչպես հայտնում են կոմիտեի մամուլի ծառայությունից, Գիտության պետական կոմիտեի նախագահը ողջունել է հյուրերին և կարևորել Հայաստան-Կուբա գիտակրթական հարաբերությունների ձևավորումը` հույս հայտնելով հետագա համագործակցության զարգացման համար: Ֆ. Դ-Բալարթ Կաստրոն ներկայացնելով այցի նպատակները՝ նշել է, որ հատկապես գիտության ոլորտում համագործակցելու, կապեր հաստատելու ակնկալիքներ կան:
Հանդիպման ընթացքում քննարկվել են հարցեր երկկողմ հետաքրքրություն ներկայացնող ոլորտներում (կյանքի մասին գիտություններ, ֆիզիկա, տեխնիկական գիտություններ) իրականացվելիք ծրագրերի մասով:
Առաջարկվել է նախապատրաստել հուշագիր՝ գիտության ոլորտում համագործակցության վերաբերյալ:
Հյուրերը կոմիտեի նախագահի ուղեկցությամբ այցելել են նաև «ՔԵՆԴԼ սինքրոտրոնային հետազոտությունների ինստիտուտ» հիմնադրամ և ՀՀ ԳԱԱ ֆիզիկական հետազոտությունների ինստիտուտ:
«ՔԵՆԴԼ» ծրագիրը միտված է 3-րդ սերնդի արագացուցչային-կուտակիչ համալիրի վրա հիմնված լուսային ճառագայթման աղբյուրի ստեղծմանը:
Համալիրն ուլտրամանուշակագույնից մինչև ռենտգենյան ալիքի երկարության լայն տիրույթում հզոր, յուրօրինակ լուսային հոսքի մոտ 40 կայանի հնարավորություն կունենա:
Այն հնարավորություն կտա ուսումնասիրել ցանկացած տեսակի նյութի կառուցվածք՝ բջջից մինչև ատոմային մակարդակը, այսինքն` ժամանակակից գիտական հետազոտություններ կատարել հիմնարար և կիրառական ուսումնասիրությունների ողջ տիրույթում` ֆիզիկայի, քիմիայի, կենսաբանության, բժշկության, շրջակա միջավայրի, նյութագիտության, դեղագործության, նանոէլեկտրոնիկայի և միկրոարտադրության բնագավառներում:-0-
