Հայաստանն ու Ռուսաստանը օգոստոսին համաձայնագիր կստորագրեն տիեզերական աղբի հետազոտման մասին

Տիեզերական աղբի հետազոտման և Բյուրականի աստղադիտարանի արդիականացման մասին մինչև 2 մլն եվրոյի հասնող համաձայնագիրը՝ կնքված ՀՀ գիտությունների ազգային ակադեմիայի և «Ռոսկոսմոս» տիեզերական դաշնային գործակալության միջև, կստորագրվի օգոստոսին, հայտնեց Բյուրականի աստղադիտարանի տնօրեն Հայկ Հարությունյանը։

«Միջազգային պայմանագիրը, որը հայկական կողմի հետ կստորագրվի օգոստոսին, վերաբերում է այն աշխատանքներին, որոնք իրականացվելու են Երկրի տարբեր կետերից տիեզերական աղբի մոնիթորինգի և առանձին տարրերի ուղեծիրների հաշվարկի շուրջ»,- ուրբաթ լրագրողներին ասաց նա։

Ըստ Հարությունյանի, այսօրվա դրությամբ աշխատանքները նպատակաուղղված են ավելի շատ տեղեկություններ հավաքելուն, քան սպառնալիքը չեզոքացելուն։

Միաժամանակ նա նշեց, որ տիեզերական աղբի հետազոտմամբ զբաղվող մասնագետների խմբում, որը գլխավորում է ռուսական կողմը, և որի հետ աշխատելու են հայ գիտնականները, տասը երկրի ներկայացուցիչներ կան:

Հարությունյանը հայտնեց, որ  այդ աշխատանքների իրագործման համար օգոստոսին նոր փոքր աստղադիտակներ կտարվեն Բյուրականի աստղադիտարան։
«Բյուրականում արդեն որոշված են դրանց տեղադրման տեղերը, ենթակառուցվածքներ են նախապատրաստվում»,- ասաց նա։

Միաժամանակ նա ավելացրեց, որ աշխատանքները տարվելու են ռուսական կողմի համար, իսկ հայ մասնագետների աշխատանքը նույնպես վճարվելու է համաձայնագրի ֆինանսական միջոցների հաշվին։

«Մեզ համար կարևոր է ոչ այդքան տեխնիկայի տրամադրումը, որքան մեր աստղադիտակների արդիականացումն ու մեր գիտնական աշխատակիցների աշխատանքների դիմաց վճարումը»,- ասաց նա։
Հարությունյանը պարզաբանեց, որ հայ գիտնականներն աշխատանքներ են տանելու շարժվող օբյեկտների հայտնաբերման, ինչպես նաև դրանց լուսապատկերային բնութագրերի և հատկությունների հետազոտման ուղղությամբ՝ դրանց չափերի և շարժման ուղեծիրների հաշվարկման նպատակով։

«Մենք հուսով ենք, որ աշխատանքները կսկսվեն արդեն սեպտեմբերին»,- ավելացրեց նա։
Աստղադիտարանի տնօրենը նաև նշեց, որ մյուս տարվանից սկսած ծրագրվում է Բյուրականի աստղադիտարանի մեծ աստղադիտակների արդիականացման  աշխատանքները։

Բյուրականի աստղադիտարանը հիմնադրվել է 1946թ.-ին Արագած լեռան վրա 1400 մետր բարձրության վրա։ 1998թ.-ից Աստղադիտարանը կրում է ականավոր գիտնական, ակադեմիկոս Վիկտոր Համբարձումյանի անունը։
-0-