Հայաստանում ընդունելության քննությունները տեսագրվելու են տեսա և լսահամակարգերով։ Այս մասին չորեքշաբթի Երևանում լրագրողներին հայտնեց Հայսաստանի կրթության և գիտության նախարար Լևոն Մկրտչյանը։
Նրա խոսքերով, քննական բոլոր դահլիճներում գրավոր քննությունների ընթացքում կտեղադվեն տեսախցիկներ քննական ընթացքին հետևելու համար, իսկ բանավոր քննությունների ժամանակ տեղի կունենա նաև ձայնագրում։
«Դա ծնողներին հնարավորություն կտա լսել քննական ողջ ընթացքը», - պարզաբանեց նա։
Լևոն Մկրտչյանը նշեց, քանի որ տեսագրումը տեղի է ունենալու ընդհանուր ռեժիմով և ներկայացնելու է դահլիճը ամբողջությամբ՝ կանգ չառնելով կոնկրետ դիմորդի վրա, ապա ծնողները, ինչպես նաև ԶԼՄ-ի ներկայացուցիչները առանձին դեպքերում հնարավորություն կստանան մտնել ընդհանուր դահլիճ և ներկա գտնվել քննությանը։
Միաժամանակ, նախարարը նշեց, որ քննական ընթացքը տևելու է մինչև օգոստոսի 10-ը, ի տարբերություն անցյալ տարվա, երբ քննությունները ավարտվել էին օգոստոսի 20-ին։
«Դա հնարավոր եղավ հայոց լեզվի և գրականության միասնական պետական քննության անցկացման շնորհիվ»,- պարզաբանեց նա։
Մկրտչյանը ասաց, որ քննությունների արդյունքների վերջնական ցուցակները կհրապարակվեն օգոստոսի 20-ին։
«Հինգ օր մենք մտադիր ենք հատկացնել բողոքարկման հարցերի լուծմանը, որից հետո արդյունքները կամփոփվեն հինգ օրվա ընթացքում», - տեղեկացրեց նա։
Հայաստանի ԲՈՒՀ-եր դիմորդների փաստաթղթերի ընդունումը սկսվել է հունիսի 15-ին և շարունակվելու է մինչև հուլիսի 15-ը ներառյալ։ Պետական ԲՈՒՀ-եր ընդունելության քննությունների մասնակցելու հայտ են ներկայացրել 12072 դիմորդ Երևանից և երկրի բոլոր տասը մարզերից։ Ընթացիկ տարում նշանակված է 25719 քննություն։
Հայաստանում ընդհանուր առմամբ գործում է 16 պետական ԲՈՒՀ։ Այսօր պետական ԲՈՒՀ-երում ուսում են ստանում մոտավորապես 65 հազ. ուսանող։--0—
