Հսկայական փայլուն աստերոիդ է մոտենում Երկրին

ԵՐԵՎԱՆ, 19 ապրիլի. /Նովոստի-Արմենիա/. Մոտ մեկուկես կիլոմետր լայնություն ունեցող JO25 աստերոիդ է մոտենում Երկիր մոլորակին։

Ապրիլի 20–ի լույս գիշերն այն կմոտենա Երկրին 1.8 մլն կմ հեռավորության վրա (Երկրից մինչև Լուսին մոտավորապես հինգ միջակայք)։

Սա վերջին 400 տարիների ընթացքում տիեզերական այսպիսի մարմնի առավելագույն մոտ հեռավորությունն է, հայտնել են ՆԱՍԱ–ում, գրում է Interfax–ը` հղում անելով BBC-ին։

ՆԱՍԱ–ում նշել են, որ ավելի մանր տիեզերական մարմինները ժամանակ առ ժամանակ անցնում են Երկրի կողքով ավելի փոքր հեռավորությունների վրա։

JO25 աստերոիդը մոլորակի համար վտանգավոր չէ, թեև ընդգրկված է Երկրի վրա կյանքի համար պոտենցիալ վտանգ ներկայացնող տիեզերական օբյեկտների ցանկում։ Եթե նմանատիպ աստերոիդը բախվեր Երկրի հետ, ամբողջությամբ կոչնչանար մայրցամաքներից մեկը, եթե նույնիսկ աստղակերպն ընկներ օվկիանոս, պնդում են մասնագետները։

Աստերոիդն ընթանալու է ռեկորդային բարձր արագությամբ` մոտ 33 կմ վայրկյան, դա կազմում է 120 հազար կմ ժամ։ Երկրի հետ ամենամոտ հեռավորության պահին իր փայլուն մակերևույթի շնորհիվ այն հնարավոր կլինի տեսնել նույնիսկ ոչ մեծ տիեզերադիտակներով, հայտնում է բրիտանական հեռուստառադիոհեռարձակող կորպորացիան։ -0-