ԵՐԵՎԱՆ, 9 հունիսի. /Նովոստի-Արմենիա/. Տեսական և կիրառական քիմիայի միջազգային կոմիտեն (IUPAC) չորս տարրի անվանում է տվել, որոնցից մեկը կոչվել է հանրաճանաչ հայ գիտնականի պատվին:
Մենդելեևի աղյուսակում հայտնվել են նիհոնիում, թեննեսին, մոսկովիում և օգանեսոն տարրերը: Վերջին տարրն անվանվել է հայազգի գիտնական Յուրի Հովհաննիսյանի պատվին։
Նիհոնիումը (Nh) 113-րդ տարրն է, մոսկովիումը (Mc)`115-րդը, թեննեսինը (Ts)` 117-րդը, օգանեսոնը (Og)` 118-րդը, նշվում է կազմակերպության կայքում, հաղորդում է
«Վզգլյադը»:
Դուբնայի միջուկային հետազոտությունների միավորված ինստիտուտի (Ռուսաստան) և Լիվերմորի ազգային լաբորատորիայի (ԱՄՆ) գիտնականները 118 ատոմային համարով տարրի համար առաջարկել են oganesson անվանումը` ի պատիվ հեղինակավոր գիտնական, պրոֆեսոր Յուրի Հովհաննիսյանի: Ընդգծվում է հետազոտությունների մեջ նրա նորարարական ներդրումը:
«Նրա բազմաթիվ ձեռքբերումները ներառում են գերծանր տարրերի բացահայտումը և նշանակալի հաջողությունները գերծանր միջուկների միջուկային ֆիզիկայի ոլորտում», - նշվում է IUPAC-ի կայքում:
Յուրի Ցոլակի Հովհաննիսյանը ծնվել է 1933 թ.–ի ապրիլի 14–ին Դոնի Ռոստովում։ Հովհաննիսյանը ֆիզիկոս է, ֆիզմաթ գիտությունների դոկտոր, պրոֆեսոր, ՌԳԱ ակադեմիկոս։
1956 թվականին Հովհաննիսյանն ավարտել է Մոսկվայի ճարտարագիտաֆիզիկայի ինստիտուտը։ 1976-1989 թթ.–ին եղել է Դուբնայի միջուկային հետազոտությունների միացյալ ինստիտուտի (ՄՀՄԻ) միջուկային ռեակցիաների լաբորատորիայի փոխտնօրեն, 1989-1997 թթ.՝ տնօրեն, 1997 թվականից՝ գիտական ղեկավար, միաժամանակ, 1971 թվականից՝ նույն լաբորատորիայի ծանր միջուկների հետազոտման բաժնի պետ, 1969-1970 թթ.՝ Փարիզի համալսարանի պրոֆեսոր, Երևանի պետական համալսարանի, Ֆրանկֆուրտի (Գերմանիա), Մեսինայի (Իտալիա) համալսարանների պատվավոր դոկտոր։ Հովհաննիսյանի աշխատանքները վերաբերում են փորձարարական միջուկային ֆիզիկային և արագացուցչային տեխնիկային։ Նրա ղեկավարությամբ կատարվել են գերծանր քիմիական տարրերի սինթեզման բազմաթիվ փորձեր, մշակվել են այդ տարրերի հատկությունների հետազոտման փորձարարական ինքնատիպ կայանքներ։–0–
