Ընդդիմադիր ՀԱԿ-ը խորհրդարանական ընտրություններին 20 տոկոսից ավել ձայն կհավաքի. ընդդիմադիր կուսակցության առաջնորդ

Հայաստանում 2012թ.-ին կայանալիք հերթական խորհրդարական ընտրություններին ընդդիմադիր Հայ ազգային կոնգրեսը 20 տոկոսից ավել ձայն կհավաքի, իսկ արտահերթ ընտրությունների դեպքում՝ 50 տոկոսից շատ ձայն, երկուշաբթի մամուլի ասուլիսի ժամանակ ասաց ընդդիմադիր Հայ ազգային կոնգրեսի կազմում ընդգրկված Սոցիալ-դեմոկրատ հնչակյան կուսակցության ղեկավար Լյուդմիլա Սահակյանը:

«ՀԱԿ-ը 2008 թ.-ից ի վեր երբեք չի դադարեցրել արտահերթ ընտրությունների համար մղվող պայքարը: Մարտյան իրադարձություններից հետո (Հայաստանի նախագահական ընտրություններից հետո 2008թ.-ի մարտի 1-2-ի անկարգություններ) ժողովրդի սոցիալ-տնտեսական վիճակը չի փոխվել, և արտագաղթ է սկսվել: Եթե այսպես շարունակվի, ապա մինչև  հերթական ընտրությունները իրավիճակը կարող է աղետալի դառնալ», - ասաց Սահակյանը:

Նրա խոսքերով՝ իշխող ուժերի ներսում լուրջ տարաձայնություններ կան, մասնավորապես՝ «Բարգավաճ Հայաստանը» ձգտում է ավելի առաջատար դիրքեր զբաղեցնել:

«Կոալիցիան՝ որպես քաղաքական ուժ չի կայացել: Այդ ուժերին համախմբում են միայն կոնկրետ շահեր՝ քաղաքական և տնտեսական: Կարծում եմ, որ ԲՀԿ-ն ընտրությունների ժամանակ առանձին հանդես կգա», - նշեց կուսակցության առաջնորդը՝ ընդգծելով, որ կոալիցիոն մյուս կուսակցությունը՝ «Օրինաց երկիրը» նման ռեսուրս չունի:

Հայաստանի իշխող կոալիցիայի կազմում են Հայաստանի Հանրապետական կուսակցությունը, «Բարգավաճ Հայաստան» և «Օրինաց երկիր» կուսակցությունները:-0-