Թուրքիայի տարածքում գտնվող Անիի Սուրբ Աստվածածին մայր տաճարում անցկացված նամազը հատուկ ուղերձ է հայ ժողովրդին, այդ կարծիքին է Մայր Աթոռ Սուրբ Էջմիածնի դիվանապետ Արշակ եպիսկոպոս Խաչատրյանը։
«Չեմ կարծում, որ նամազի անցկացումը կապված էր թուրքական քաղաքական խաղին մասնակցելուն (Ախթամարի Սուրբ Խաչ եկեղեցում պատարագի հետ կապված) Հայ Առաքելական Եկեղեցու մերժման հետ, այն պարզապես ուղերձ է հայ ժողովրդին՝ ակնարկելով, որ բոլոր պատմական և կրոնական հուշարձանները, որոնք գտնվում են Թուրքիայի տարածքում, թուրքերին են պատկանում, և նրանք կարող են այնտեղ անել այն, ինչ ցանկանում են»,- երեքշաբթի լրագրողներին ասաց եպիսկոպոս Խաչատրյանը։
Գրեթե հարյուր տարի անց առաջին ժամերգությունն Ախթամար կղզու Սուրբ Խաչ հայկական եկեղեցում տեղի ունեցավ սեպտեմբերի 19-ին։ Մայր Աթոռ Սուրբ Էջմիածինը պաշտոնապես հրաժարվեց պատարագին մասնակցել, քանի որ թուրքական կողմը խոստումներին հակառակ եկեղեցու գմբեթին խաչ չտեղադրեց։
Հոկտեմբերի 1-ին տեղեկություն ստացվեց, որ Սուրբ Խաչ եկեղեցու գմբեթին արդեն տեղադրվել է խաչը, միևնույն օրը՝ թուրքական իշխանությունների թույլտվությամբ, Թուրքիայի ազգայնական շարժում կուսակցության կողմից նամազ է անցկացվել Անիի Սուրբ Աստվածածին հայկական մայր տաճարում։
Եպիսկոպոսը հայկական եկեղեցում անցկացված նամազը նույնպես չի կապում տարբեր երկրներում Ղուրանի այրման դեպքերի հետ, «քանի որ նամազի անցկացումը ոչ մի ընդհանրություն չի ունեցել մաքուր կրոնական զգացմունքների հետ, այն պարզապես քաղաքական ակցիա է եղել»։
Ըստ նրա՝ որքան էլ Թուրքիան փորձի հակառակն ապացուցել, այնտեղ ազգային փոքրամասնությունների ներկայացուցիչների հոգևոր կյանքին պետական մակարդակով աջակցություն գոյություն չունի։ «Թուրքիայում միայն իսլամը կարող է պետական աջակցություն ստանալ»,- ասաց Սբ. Էջմիածնի դիվանապետը։
Միաժամանակ եպիսկոպոսը չբացառեց այն հնարավորությունը, որ Սուրբ Խաչի գմբեթին խաչի տեղադրումից հետո ՀԱԵ-ն հետագայում կարող է այնտեղ մասնակցել կրոնական արարողություններին, քանի որ ի տարբերություն Թուրքիայի հոգևոր իշխանությունների՝ եկեղեցին չի զբաղվում քաղաքականությամբ։ -0-
