ԵՐԵՎԱՆ, 7 մայիսի. /Նովոստի-Արմենիա/. ՀՀ պաշտոնական պատվիրակությունը` ԱԺ նախագահ Հովիկ Աբրահամյանի գլխավորությամբ, մայիսի 8-ին կմեկնի Լեռնային Ղարաբաղի Հանրապետություն` մասնակցելու Հայրենական մեծ պատերազմում տարած հաղթանակի 65- ամյակին և Շուշիի ազատագրման օրվան նվիրված հանդիսություններին:
Ինչպես տեղեկացնում է խորհրդարանի մամուլի ծառայությունը, մայիսի 8-ի երեկոյան պատվիրակությունը կմասնակցի Հաղթանակի և խաղաղության տոնին նվիրված հանդիսավոր երեկոյին:
Մայիսի 9-ին պատվիրակության անդամները ծաղկեպսակ և ծաղիկներ կդնեն Ստեփանակերտում և Շուշիում, Սուրբ Ամենափրկիչ Ղազանչեցոց մայր տաճարում կմասնակցեն սուրբ պատարագի արարողությանը:
Պատվիրակության կազմում են փոխվարչապետ Արմեն Գևորգյանը, ԱԺ փոխնախագահ Սամվել Նիկոյանը, պատգամավորներ, նախարարներ և այլ պաշտոնատար անձինք։
Մայիսի 9-ի երեկոյան հայկական պատվիրակությունը կվերադառնա Երևան։ -0-
