ԵՐԵՎԱՆ, 24 փետրվարի. /Նովոստի-Արմենիա/. Անգլիական «Թոթենհեմ Հոթսփուրս» ակումբը հայկական «Փյունիկին» 1 միլիոն ֆունտ ստեռլինգ կվճարի զամբիացի պաշտպան Էմանուել Մբոլայի համար, գրում է «Հայոց Աշխարհ» թերթը:
Ըստ թերթի՝ իր երկրի հավաքականի կազմում Աֆրիկայի ազգերի գավաթի խաղարկությանը մասնակցելուց հետո Մբոլան Հայաստան չի վերադարձել, նա անմիջապես մեկնել է Լոնդոն և Թոթենհեմում փորձաշրջան է անցել:
Մինչ երևանյան ակումբի ղեկավարությունը սպառնում է պատժամիջոցներ կիրառել նրա նկատմամբ, անգլիական ակումբի ղեկավարությունը հայտարարել է, որ պատրաստվում է Մբոլայի համար վճարել 1 միլիոն ֆունտ:
Թերթը նաև գրում է, որ Մբոլան արժանացել է անգլիական թիմի մարզիչ Հարի Ռեդնապի համակրանքին, և շուտով նրա հետ պայմանագրի կկնքվի: Սակայն հաշվի առնելով այն փաստը, որ զամբիացին ընդամենը 16 տարեկան է, փորձ ձեռք բերելու համար այս մրցաշրջանը վարձակալության սկզբունքներով նա կանցկացնի եվրոպական որևէ այլ ակումբում:-0-
