Հայաստանին 2010թ.-ին ոչ մեծ տնտեսական աճ է սպասվում, կարծում է ՀՀ Կենտրոնական բանկի նախագահ Արթուր Ջավադյանը:
«2010թ.-ին Հայաստանին սպասվում է չնայած ոչ մեծ, սակայն դրական տնտեսական աճ», - ասաց Ջավադյանը՝ պատասխանելով www.armbanks.am կայքում կազմակերպված օն-լայն ասուլիսի հարցերին:
Նրա խոսքերով, 2009թ.-ի ընթացքում ԿԲ-ն իր հրատարակումներում բազմաթիվ անգամ նշել է, որ կանխատեսումների համաձայն, հանրապետությունում տնտեսական անկումը կհասնի ամենաբարձր կետին 2009թ.-ի երրորդ կիսամյակում: Ջավադյանը հիշեցրեց, որ 2009թ.-ի հունվար-հուլիսին տնտեսական անկումը, նախորդ տարվա նույն ժամանակահատվածի համեմատ, հասել էր 18,5 տոկոսի:
«Սակայն ՀՀ կառավարության և Կենտրոնական բանկի կողմից ձեռնարկված համակարգված հակաճգնաժամային միջոցառումների շնորհիվ՝ արդեն օգոստոսին հաջողվեց թևակոխել տնտեսական ակտիվության վերականգնման փուլ և արդյունքում՝ 2009 թ.-ի հունվար-նոյեմբերին գրանցվեց տնտեսական անկման տեմպերի դանդաղում, որը կազմեց 16 տոկոս», - ասաց նա:
Ջավադյանը նշեց, որ ճգնաժամի ազդեցությամբ բացահայտվեցին հայկական տնտեսության թույլ կողմերը, որոնց մասին բազմիցս խոսել են կառավարությունը, Կենտրոնական բանկն ու միջազգային կազմակերպությունները: ՀՀ Կենտրոնական բանկի նախագահը դրանց թվին դասեց, մասնավորապես, դիվերսիֆիկացման ցածր մակարդակը, «երկար» փողերի հետ աշխատող ինստիտուտների պակասը, մրցակցային դաշտի անարդյունավետությունը, ինչպես նաև գների թույլ ճկունությունն ու ոչ բավարար գրավիչ ներդրումային միջավայրը:
«Մենք լիահույս ենք, որ վերը նշված խնդիրների լուծմանն ուղղված կառավարության միջոցառումները կտան իրենց դրական արդյունքները՝ ուժեղացնելով տնտեսության դիմադրողականությունն ու մրցունակությունը», - ասաց նա:-0-
