ՀՀ գիտության և կրթության նախարարությունը կարևորում է հայ-իտալական համագործակցությունը կրթության ոլորտում
ՀՀ գիտության և կրթության նախարարությունը կարևորում է հայ-իտալական համագործակցությունը կրթության ոլորտում, հայտարարեց կրթության նախարար Արմեն Աշոտյանը Իտալիայի Հանրապետության արտակարգ և լիազոր դեսպան Բրունո Սկապինիի հետ հանդիպման ժամանակ:
Ինչպես տեղեկացվում է ՀՀ Կրթության նախարարության պաշտոնական կայքում, կողմերը հայ-իտալական համագործակցության ընդլայնման շրջանակում նախանշեցին հաջորդ տարվա ծրագրերը:
«ՀՀ կառավարությանը հաջողվել է տնտեսական ճգնաժամի պայմաններում պահպանել կրթական հիմնական ծրագրերի ֆինանսավորումը և մենք հուսով ենք, որ մեր գործընկերների աջակցությամբ կկարողանանք նաև իրականացնել այլ ծրագրեր»,- ասաց նախարարը:
Նա նաև հույս հայտնեց, որ հաջորդ տարի երկու երկրների միջև համագործակցությունն ավելի ընդգծված կրթական եզրեր կունենա:
Իր հերթին դեսպանն ընդգծեց հայ-իտալական համագործակցության յուրահատկությունը:
«Մենք ունենք պատմական և մշակութային նմանություններ, որոնք միավորում են մեզ և հնարավորություն տալիս համագործակցությունն ընդլայնել ոչ միայն կրթության և մշակույթի, այլև տնտեսության ոլորտներում»,- ասաց Սկապինին:
Նախարարը և դեսպանը քննարկեցին Երևանի և Գյումրու մեկական հանրակրթական դպրոցում որպես երրորդ օտար լեզու իտալերենի ուսուցման փորձնական ծրագիր իրականացնելու հետ կապված խնդիրները:
Աշոտյանը ներկայացրեց նաև հանրակրթական ուսումնական հաստատություններում տեխնիկական աջակցության, մշակութային բուհերի դասախոսների և ուսանողների փոխանակման, վարպետաց դասերի կազմակերպման, Իտալիայում գտնվող հայկական կրթամշակութային ժառանգության քարոզման ու հանրային իրազեկման համատեղ ծրագրեր իրականացնելու առաջարկներ:
Նախնական պայմանավորվածություն ձեռքբերվեց առաջարկությունների հիման վրա մշակել ծրագրեր` հետագայում քննարկելու նպատակով:-0-
