ԵՐԵՎԱՆ, 1 փետրվարի./Նովոստի-Արմենիա/. Ո՞նց կարելի է հակամարտող երկրի ղեկավարին բնութագրել կառուցողական: Այսպիսի հարցադրում է արել ՀՀ երրորդ նախագահ Սերժ Սարգսյանը՝ հարցազրույցի ժամանակ անդրադառնալով ՀՀ վարչապետ Նիկոլ Փաշինյանի հայտարարությանն այն մասին, որ Հայաստանն էլ է կառուցողական տրամադրված, Ադրբեջանն էլ:
«Ո՞նց կարելի է հակամարտող երկրի ղեկավարի բնութագրումը այդպես դրանով սահմանափակել` կառուցողական է: Երբևէ դուք ինձանից լսել եք, որ ես ասեմ, որ Ալիևը կառուցողական է: Կարելի է ասել, որ նա իրատեսական է, կարելի է ասել, եթե շատ ուզում եք` խելացի է, կրթված է և այլն: Բայց ի՞նչ է նշանակում կառուցողական: Որտե՞ղ երևաց կառուցողականությունը: Որտե՞ղ», - հարցադրում է արել Սարգսյանը՝ նշելով, որ բանակցային գործընթացի ամբողջ այս շիլաշփոթը երկու հանգամանքով է պայմանավորված:
«Մի հանգամանքը, իրոք, թեմային չտիրապետելն էր: Եվ մեծամտություն էր, որ իրենք կարող էին նոր բան հնարել` արհամարհելով, կողքի գցելով համանախագահների առաջարկությունները: Երկրորդ բանը, ես կարծում եմ, որ միգուցե, թեև իրենք այդքան վատ են մտածում մեր մասին, ես ինչ-որ տեղ փորձում եմ ինձ համոզել, որովհետև մարդիկ ցանկություն ունեն կամ ունեին, ավելի լավ պրոցես ստանալու: Բայց ցանկությունը, չի կարող իրականացվել առանց համապատասխան հանգամանքների` գիտելիք, ուժ, ճկունություն և այլն», - ասաց Սարգսյանը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
