ԵՐԵՎԱՆ, 13 ապրիլի./Նովոստի–Արմենիա/. Մի շարք համաշխարհային հեղինակավոր լրատվամիջոցներ, քաղաքական գործիչներ, տարբեր կազմակերպություններ, այդ թվում` Freedom House–ը, Ադրբեջանի նախագահ Իլհամ Ալիևին համեմատել են Ադոլֆ Հիտլերի և Սադամ Հուսեյնի հետ։
Նախօրեին Բաքվում բացվել է 2020 թվականի սեպտեմբեր-նոյեմբեր ամիսների պատերազմին վերաբերող այսպես կոչված «ցուցահանդես-պուրակ», որը բազմաթիվ լրատվամիջոցներ արդեն անվանել են «Ռազմական սարսափների պուրակ»։
«Պուրակում» հայկական զինվորական տեխնիկայի հետ միասին ցուցադրված են հայկական զինված ուժերի ծառայողների կերպարներ (մանեկեններ), որոնք բոլորն էլ ներկայացված են արժանապատվությունը ոտնահարող, նվաստացուցիչ վիճակում: ԶԼՄ–ներում մասնավորապես ցինիզմի գագաթնակետ են անվանել այն լուսանկարը, որում Ալիևն անցնում է սպանված և գերեվարված հայերի սաղավարտներից պատրաստված ճեմուղով (մոտիկից նայելիս` շատերի վրա կարելի է տեսնել գնդակներից առաջացած անցքեր)։
«Պուրակի» բացման կապակցությամբ իրենց վրդովմունքն են հայտնել այնպիսի հայտնի հրատարակությունների թղթակիցներ, ինչպիսիք են France 24–ը, The Guardian–ը, BuzzFeed–ը, Times–ը, Bloomberg–ն ու այլք, գործող և նախկին քաղաքական գործիչներ։
«Սադամ Հուսեյնն օգտագործել է իրանական սաղավարտները Բաղդադում հաղթանակի մեծ հուշարձանը զարդարելու համար` հսկայակ խաչված թրերով», – զուգահեռներ է անցկացրել ամերիկացի նախկին դիվանագետ Ալբերտո Միգել Ֆերնանդեսը` Twitter–ում մեկնաբանելով Ալիևի լուսանկարը` հայկական սաղավարտների ֆոնին։
Ամերիկացի լրագրող և մարդաբան Ջուլիան Մակբրայդը հրապարակել է կոլաժ` Ալիևի նույն լուսանկարով և Սերբիայի Նիշ քաղաքի խաղաղ բնակիչների կմախքե գլուխների լուսանկարով, որոնք զմռսված են պատի մեջ։
«Վերևում Սերբիայի Նիշ քաղաքն է, որտեղ օսմանյան լծի ժամանակ թուրքերը սպանել են խաղաղ բնակիչներին` վրեժխնդիր լինելով կազմակերպված ապստամբության համար և զմռսել են նրանց գլուխները պատի մեջ։ Ներքում դիկտատոր Ալիևն է` հայ զինվորների սաղավարտների պատի մոտ։ Պանթյուրքիզմն այնքան հիանալի է։ Հաշտեցու՞մ», – գրել է նա Instagram–ի իր էջում։
Ամերիկացի հայտնի լրագրող և պրոդյուսեր Լինդսի Սնելը հայտարարել է, որ Ադրբեջանում ռազմական հանցագործությունները խրախուսվում են այդ երկրի իշխանությունների կողմից։
«Զարմանալի չէ, որ Ադրբեջանի այդքան շատ զինծառայողներ արձանագրել են, որ կատարել են դաժան ռազմական հանցագործություններ։ Այս տեսակ անբարոյականությունը խրախուսվում և տոնվում է պետական մակարդակով», –
նշելէ նա Twitter–ի իր էջում։–0–