Ադրբեջանը նոր հարձակում է պատրաստում Հայաստանի վրա․ Փաշինյան

ԵՐԵՎԱՆ, 23 փետրվարի․/Նովոստի–Արմենիա/․ Ադրբեջանն, իրականում, նոր հարձակում է նախապատրաստում Հայաստանի վրա։ Այս մասին France 24-ին տված հարցազրույցում ասել է ՀՀ վարչապետ Նիկոլ Փաշինյանը։

«Հրապարակվել է երեք սկզբունք (խաղաղության պայմանագրի - խմբ.)՝ միջազգային հարթակներում ձեռք բերված պայմանավորվածությունների համաձայն։ Մեր խնդիրն է այդ սկզբունքներն արտացոլել խաղաղության պայմանագրում։ Եթե հաշվի ենք առնում այդ սկզբունքները, ապա կհասնենք դրան։ Եթե հաշվի ենք առնում պաշտոնական Բաքվի հայտարարությունները, ապա կարելի է ենթադրել, որ նոր հարձակումը շատ հնարավոր է»,- ասել է Փաշինյանը։

Նրա խոսքով, հաճախ հնչում են «Արևմտյան Հայաստանի» մասին հայտարարություններ։ Դրանք, իրականում, նշանակում են, որ «Արևմտյան Ադրբեջանը» ժամանակակից Հայաստանն է, այսինքն՝ Ադրբեջանը հավակնում է նրա տարածքի զգալի մասին։

«Եթե տարածքային անվտանգության և սահմանների անձեռնմխելիության սկզբունքները չեն ճանաչվել Ադրբեջանի կողմից, ապա նշանակում է, որ այն սկզբունքները, որոնք ես նոր հիշատակեցի և որոնք պետք է արտացոլվեն խաղաղության պայմանագրում, իրականում չեն հարգվում Ադրբեջանի կողմից», – ասել է Փաշինյանը։

Ավելի վաղ Հայաստանի վարչապետ Նիկոլ Փաշինյանը հայտարարել է, որ Ադրբեջանի հետ համաձայնեցվել են խաղաղության պայմանագրի երեք հիմնարար սկզբունքներ։ Ըստ նրանց՝ Հայաստանն ու Ադրբեջանը ճանաչում են միմյանց տարածքային ամբողջականությունը՝ համապատասխանաբար 29,8 և 86,6 հազար քառակուսի կիլոմետրի սահմաններում։ Սահմանազատումն իրականացվում է Ալմա-Աթայի հռչակագրի հիման վրա: Ապաշրջափակվում են բոլոր տարածաշրջանային հաղորդակցությունները։ Հայկական կողմը հայտարարում է, որ եթե քաղաքական կամք լինի, համաձայնագիրը կարող է ստորագրվել մոտ ապագայում։-0-