ԵՐԵՎԱՆ, 28 սեպտեմբերի./Նովոստի–Արմենիա/. Ստեղծված իրավիճակում առաջինը հանրային կոնսոլիդացիան է. սա ուղղակի անհրաժեշտ պայման է, առանց սրա ոչինչ չի ստացվելու, հայտարարեց ՀՀ երկրորդ նախագահ Ռոբերտ Քոչարյանը։
«Գիտե՞ք կոնսոլիդացիան իրականացնում են ժողովրդին հաղթանակի մղելու համար, կապիտուլյացիայի համար կոնսոլիդացիայի կարիք չկա: Կապիտուլյացիայի համար պետք է հակառակը՝ դե կոնսոլիդացիա: Այս պարզ ճշմարտություններն իրար խառնելը չեմ հասկանում՝ դա չգիտակցելո՞վ է արվում, թե՞ նպատակաուղղված», – ասաց նա այսօր ասուլիսի ժամանակ։
Հիշեցնենք, որ մի քանի օր առաջ ՀՀ առաջին նախագահ Լևոն Տեր–Պետրոսյանը
հայտարարել է, որ Հայաստանը պետք է պայմանագրեր ստորագրի Ադրբեջանի և Թուրքիայի հետ, ինչպես նաև նշել է, որ հաշվի առնելով երկրի առջև ծառացած լուրջ խնդիրները և ցավոտ լուծումներն` անհրաժեշտ է բոլոր ուժերի կոնսոլիդացիա, պետք է սկսել երկխոսություն իշխանության և ընդդիմության միջև։
«Կապիտուլյացիան դեգրադացիա է առաջացնում, նաև անզորության զգացում, սա է միգուցե պետք այսօր այն մարդկանց, որոնք կոչ են անում կոնսոլիդացվել՝ հանրային կոնսոլիդացիա կապիտուլյացիայի համար», – հայտարարեց Քոչարյանը։
Նրա խոսքով, եթե մենք ուզում ենք հանրային կոնսոլիդացիա, ապա պետք է դա ունենալ բարձր, դժվար հասանելի, ժողովրդի կամք պահանջող նպատակների համար: Հենց այս կոնտեքստում իշխանափոխությունը իմպերատիվ պահանջ է։
«Բայց, երբ ասում ենք իշխանափոխություն, այն խորհրդարանական երկրում կարող է լինել ամբողջական կամ մասնակի: Օրինակ՝ երբ խորհրդարանն ընտրում է վարչապետի, իրականում դա մասնակի իշխանափոխություն է, քանի որ վերահսկիչ փաթեթը մնում է այդ քաղաքական թիմի մոտ: Սա այն հարցն է, որը քննարկվելիք թեմա կարող է լինել քաղաքական դաշտում: Մի բան ակնհայտ է՝ մենք չենք կարող բուժվել այն միջավայրում, որը մեզ հիվանդացրել է», – նշեց Քոչարյանը։
Խոսելով Հայաստանի, Արցախի նախկին նախագահների և Ամենայն Հայոց Գարեգին Երկրորդ Կաթողիկոսի հանդիպման մասին` Քոչարյանը հերքեց Լևոն Տեր–Պետրոսյանի հայտարարությունն այն մասին, որ նա ընթերցել է իշխանությունների հետ երկխոսություն սկսելու առաջարկը։ Միաժամանակ Քոչարյանը ձեռնպահ մնաց ներկայացնել հանդիպման մանրամասները։
Կաթողիկոսի և նախկին նախագահներ Լևոն Տեր–Պետրոսյանի, Ռոբերտ Քոչարյանի, Սերժ Սարգսյանի, ինչպես նաև Արցախի նախկին նախագահներ Արկադի Ղուկասյանի և Բակո Սահակյանի հանդիպումը տեղի է ունեցել սեպտեմբերի 22–ին։ Մայր Աթոռի տեղեկատվական համակարգի պաշտոնական հաղորդագրության մեջ հանդիպման մանրամասների մասին տեղեկություն չկար։–0–
