ԵՐԵՎԱՆ, 17 փետրվարի. /Նովոստի-Արմենիա/. Ղարաբաղյան պատերազմի հերոսներից մեկը` գեներալ-մայոր Արկադի Տեր-Թադևոսյանը (Կոմանդոս), Facebook-յան իր էջում հրապարակել է մի փաստաթուղթ, որն ապացուցում է, որ Խոջալուի բնակիչները իրենց հայտնի և իրենց կողմից օգտագործվող արահետներով կարող էին լքել քաղաքը 1992 թ.-ի փետրվարին:
«Խոջալուի ազատագրումից հետո ադրբեջանական ռազմական շտաբում հայտնաբերվել են մի շարք փաստաթղթեր: Դրանցից մեկը վկայում է, որ ադրբեջանցիք կարող էին լքել քաղաքը երկու ուղղություններով, որոնք թույլ էին տալիս ապահովել ոչ միայն մարդկանց, այլ նաև ռազմական տեխնիկայի տեղափոխումը», - նշել է Կոմանդոսը, ով 1992 թ.-ին ղեկավարում էր Շուշիի ազատագրման օպերացիան:
«Առաջարկում ենք ծանոթանալ փաստաթղթերից մեկին, և դուք կհամոզվեք, որ խաղաղ բնակիչները կարող էին լքել քաղաքն իրենց հայտնի արահետներով, որոնցից օգտվում էին», - ընդգծել է նա:
Գեներալ Տեր-Թադևոսյանի կողմից հրապարակված փաստաթուղթը ներկայացնում ենք ստորև:
1992թ. փետրվարի 25-26-ը ղարաբաղյան կողմը ռազմական գործողություն է սկսել Խոջալու բնակավայրի կրակակետերի վերացման և նույն ավանի մոտ գտնվող միակ օդանավակայանի ապաշրջափակման նպատակով: 1991թ-ից սկսած հենց այդտեղից են Լեռնային Ղարաբաղի բնակավայրերը ենթարկվել ադրբեջանական օմոնականների հարձակումներին, գնդակոծվել «Ալազան», «Կրիստալ» և համազարկային կրակի «Գրադ» ռեակտիվ կայանքներից:
Խոջալուն գրոհող ԼՂՀ ինքնապաշտպանական ուժերը խաղաղ բնակիչների համար միջանցք էին թողել անվտանգ հեռանալու համար, ինչի մասին նախօրոք տեղեկացվել է հակառակորդ կողմը: Խոջալուի կրակակետերը ճնշելու գործողության նախապատրաստման մասին ևս հակառակորդին տեղեկացվել էր երկու ամիս առաջ, ինչը հաստատել են նաև Ադրբեջանի պաշտոնատար անձիք, մասնավորապես, այն ժամանակվա նախագահ Այազ Մութալիբովը։
Սակայն Ադրբեջանի իշխանությունները ոչինչ չեն ձեռնարկել խաղաղ բնակչությանը մարտական գործողություների գոտուց դուրս բերելու համար: Ավելին, խաղաղ քաղաքացիների շարասյունները գնդակահարվել են Աղդամի շրջանի սահմանային մատույցներում, որն ավելի ուշ հաստատել է Ա.Մութալիբովը` այդ հանցավոր գործողությունը կապելով իրեն իշխանությունից հեռացնելու և պատասխանատվությունը իր վրա բարդելու ընդդիմության փորձերի հետ: -0-
