Արցախում քննարկել են Ադրբեջանի ագրեսիայի հետևանքով հասցված վնասի վերականգնման հարցերը

ՍՏԵՓԱՆԱԿԵՐՏ, 15 ապրիլի./Նովոստի–Արմենիա/. Արցախի Հանրապետության նախագահ Բակո Սահակյանն ուրբաթ հրավիրել է աշխատանքային խորհրդակցություն, որի ընթացքում քննարկվել են Ադրբեջանի ագրեսիայի հետեւանքով մեր քաղաքացիներին ու բնակավայրերին հասցված նյութական վնասի վերականգնմանը, տարածքային կառավարման օղակների եւ պաշտպանության բանակի ստորաբաժանումների փոխգործակցությանն առնչվող հարցեր։

Ինչպես հաղորդում է Արցախի Հանրապետության նախագահի տեղեկատվության գլխավոր վարչությունը, զեկույցներով հանդես են եկել վարչապետ Արայիկ Հարությունյանը, փոխվարչապետ Արթուր Աղաբեկյանը, պաշտպանության նախարար Լեւոն Մնացականյանը, Ստեփանակերտի քաղաքապետ Սուրեն Գրիգորյանը, վարչակազմերի եւ շահագրգիռ մյուս մարմինների ղեկավարները: 

Նախագահը կոնկրետ հանձնարարականներ է տվել աշխատանքների պատշաճ իրականացման ուղղությամբ:

Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։ –0–