Երևանի թռչնաբուծական ֆաբրիկայում բռնկված խոշոր հրդեհը մարվել է, դեպքի վայր էր մեկնել 4 մարտական հաշվարկ

ԵՐԵՎԱՆ, 26 հունիսի./Նովոստի–Արմենիա/. Հունիսի 26-ին, ժամը 15։31-ին Ճգնաժամային կառավարման ազգային կենտրոն ահազանգ է ստացվել, որ Երևանի Շիրակի 43 հասցեում՝ «Երևանի թռչնաբուծական ֆաբրիկա»-ի տարածքում, այրվում է խոտածածկ տարածք, հաղորդում է ՀՀ ԱԻՆ Փրկարար ծառայությունը։


Հրդեհի բարդության «1-ԲԻՍ» կանչով դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ, երկու ջրատար, հրդեհաշիջման և փրկարարական աշխատանքների կազմակերպման բաժնի օպերատիվ խումբը և բժշկական ապահովման վարչության հերթապահ բժիշկը։

Պարզվել է, որ հրդեհը բռնկվել է «Երևանի թռչնաբուծական ֆաբրիկա» ԲԲԸ-ի տանիքում։

Հրդեհը մեկուսացվել է ժամը 16։55-ին, մարվել՝ 17։38-ին։

Այրվել են երկու շինությունների տանիքների (յուրաքանչյուրը՝ 1300 քմ) կառուցատարրերը՝ 300 քմ և 100 քմ, ինչպես նաև՝ 1000 քմ խոտածածկ տարածք։–0–