Վրաստանում քարեր են նետել հայկական բեռնատարների ուղղությամբ, ջարդել դիմային ու կողային ապակիները (ՎԻԴԵՈ)
ԵՐԵՎԱՆ, 25 հունվարի./Նովոստի–Արմենիա/. Այսօր՝ կեսգիշերն անց, Վրաստանի Քվեմո Փոնիճալա բնակավայրի մոտակայքում անհայտ անձինք քարեր են նետել հայկական բեռնատարների ուղղությամբ, ջարդել որոշ բեռնատարների դիմային ու կողային ապակիները և փախչել դեպքի վայրից, հաղորդում է Վրաստանում ՀՀ դեսպանատունը։
Այնուհետև բեռնատարները պարեկային ոստիկանության ուղեկցությամբ հասել են վրաց-հայկական սահման և հատել այն։
Վրաստանի ներքին գործերի նախարարությունը սույն դեպքի առնչությամբ քրեական գործ է հարուցել։
«Վրաստանում ՀՀ դեսպանությունը մշտական կապ է պահպանում Վրաստանի պատկան մարմինների հետ և միաժամանակ ակտիվ աշխատանք կատարում, որպեսզի մեղավորներն օրենքի շրջանակներում պատասխանատվության ենթարկվեն, և բացառվի նման դեպքերի կրկնությունը», – նշվում է դեսպանատան հաղորդագրության մեջ:–0–
