25 մեքենայից գողություն է կատարել․ մշտական բնակության վայր չունեցող 34–ամյա երիտասարդը կալանավորվել է (ՎԻԴԵՈ)
ԵՐԵՎԱՆ, 5 դեկտեմբերի․/Նովոստի–Արմենիա/․ Համայնքային ոստիկանության Մալաթիայի բաժնում նոյեմբերի 21-ին տարբեր քաղաքացիներից մեքենաներից գողության մասին հաղորդումներ ստացվեցին։ Գողացել էին կողային հայելիների ապակիներ, նիկելապատ և այլ դետալներ, հաղորդում է ՀՀ ոստիկանությունը։
ՀԿՀ ավագ տեսուչ Գևորգ Մինասյանի խոսքով՝ «Համայնքային ոստիկանության Մալաթիայի բաժնի ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ գողությունները կատարել է 34-ամյա մի երիտասարդ, որը մշտական բնակության վայր չունի»:
Մինչ իրավապահները կասկածյալին հայտնաբերելու ուղղությամբ ձեռնարկում էին անհրաժեշտ գործողություններ, ստացվեց ևս մեկ տեղեկություն, որ տվյալ քաղաքացին գողոնը փորձում է իրացնել մայրաքաղաքի Անդրանիկի փողոցում։ Անմիջապես մեկնելով նշված հասցե՝ համայնքային ոստիկանները երիտասարդին ձերբակալել և, գողոնով հանդերձ, տեղափոխել են բաժին։
Պարզվել է, որ նա գողության հատկանիշներով նախաձեռնված մեկ այլ քրեական վարույթով գտնվում է հետախուզման մեջ։
Երիտասարդը խոստովանել է նաև, որ նոյեմբերին Մալաթիա-Սեբաստիա վարչական շրջանում կայանված շուրջ 25 մեքենայից կատարել է նմանատիպ գողություններ։
Նա և կազմված փաստաթղթերը ներկայացվել են քննչական բաժին։ Երիտասարդը կալանավորվել է։
Գողության մասին նմանատիպ հաղորդումներ ստացվեցին նաև օրեր անց։ Դարձյալ գողացել էին մեքենաների կողային հայելիների ապակիներ։
Ձեռնարկվեցին անհետաձգելի օպերատիվ-հետախուզական միջոցառումներ՝ հանցագործությունը թարմ հետքերով բացահայտելու համար: Շուտով Մալաթիայի համայնքային ոստիկանները օպերատիվ տեղեկություններ ստացան, որ գողությունները կատարել է մայրաքաղաքի Մանանդյան փողոցի 27-ամյա բնակիչը։ Նա ձերբակալեց և, գողոնով հանդերձ, ներկայացվեց Համայնքային ոստիկանության Մալաթիայի բաժին, ապա Մալաթիա-Սեբաստիա վարչական շրջանի քննչական բաժին։
Նախաձեռնված քրեական վարույթը շարունակվում է։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
