Զինված անձինք շարունակում են պատանդ պահել հինգ ոստիկանի. ոստիկանություն
ԵՐԵՎԱՆ, 18 հուլիսի. /Նովոստի–Արմենիա/. Նախօրեին ՊՊԾ գնդի շենքը գրաված զինված անձինք շարունակում են պատանդ պահել հինգ ոստիկանի, երկուշաբթի լրագրողներին հայտարարեց ՀՀ փոխոստիկանապետ Հունան Պողոսյանը։
Նա հիշեցրեց, որ ԱԱԾ–ի հաղորդագրության համաձայն, իրավիճակը մնում է նույնը։ Բանակցությունների արդյունքում ազատ է արձակվել մեկ ոստիկան և քաղաքացիական անձ` շտապօգնության մեքենայի վարորդը։
ՊՊԾ գնդի գրավման հետևանքով տուժածներից մեկը դուրս է գրվել հիվանդանոցից>>
«Ազատ արձակված ոստիկանը ՊՊԾ–ի աշխատակից է, ավելին չեմ կարող ասել», – նշեց նա։
Պողոսյանը նաև ավելացրեց, որ հիմա իրավապահ կառույցները շարունակում են իրականացնել համապատասխան օպերատիվ–հետախուզական և կանխարգելիչ միջոցառումներ, որոնց մասին տեղեկատվությունը կտրամադրվի պատշաճ ժամկետներում։
Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, չորս ոստիկան վիրավորվել է։ Զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -0-
