ԵՐԵՎԱՆ, 26 մարտի. /Նովոստի–Արմենիա/. ՌԴ Կեմերովո քաղաքի «Զիմնյայա վիշնյա» առևտրի կենտրոնում նախօրեին բռնկված հրդեհի վայրում փրկարարները հայտնաբերել են 53 զոհի մարմիններ, հաղորդում է ՏԱՍՍ–ը` հղում անելով օպերատիվ շտաբի տվյալներին։
«Առևտրի կենտրոնում գործող կինոթատրոններից մեկի մոտ հայտնաբերվել է ևս հինգ մարդու մարմին։ Զոհերի ընդհանուր թիվը 53 է», – ասել է շտաբի ներկայացուցիչը։
Նա նաև տեղեկացրել է, որ 12 մարդ հոսպիտալացվել է, ևս 36 տուժած ստացել է ամբուլատոր բուժօգնություն։
Շտաբից նաև տեղեկացրել են, որ այժմ իրականացվում են աշխատանքներ ևս 16 մարդու որոնման ուղղությամբ։ «Նրանք կարող են գտնվել կինոսրահներում, որոնք հիմա չորրորդ հարկից հայտնվել են երրորդում», – պարզաբանել է գործակալության զրուցակիցը։
ՔԿ–ն ևս հաստատել է 53 զոհերի մասին տեղեկատվությունը։
ՌԴ ԱԻ փոխնախարար Վլադլեն Ակսյոնովն ավելի վաղ հաղորդել էր 48 զոհի մասին։
Նա նաև տեղեկացրել է, որ որոշ վայրերում հայտնաբերվել են հրդեհի առանձին օջախներ։ «Երեք կինոսրահներից երկուսը չորրորդ հարկից հայտնվել են երրորդ հարկում», – ավելացրել է նա։ –0–