ԵՐԵՎԱՆ, 26 օգոստոսի. /Նովոստի–Արմենիա/. Ռուսաստանից Հայաստան է հայրենադարձվել Կարեն Շահինյանը, ով մեղադրվում է Երևանի բուքմեյքերական գրասենյակներից մեկի աշխատակցին սպանելու մեջ։
Հանցագործությունը կատարվել է 2015 թ.–ի դեկտեմբերի 24–ի գիշերը։ Ավազակային հարձակման զոհը մահացել է վզի, կրծքավանդակի և որովայնի շրջանում ստացված բազմաթիվ կտրող–ծակող վերքերից։ Հանցագործը բուքմեյքերական գրասենյակից վերցրել էր այնտեղ պահվող գումարը։
Հարուցվել էր քրեական գործ ՀՀ ՔՕ 104–րդ հոդվածի 2–րդ մասի 8–րդ կետի (սպանություն, որը կատարվել է շահադիտական դրդումներով) և 175–րդ հոդվածի 2–րդ մասի 4–րդ կետի (ավազակություն` զենքի կիրառմամբ)։ Որպես մեղադրյալ ներգրավվել էր Կարեն Շահինյանը, ում նկատմամբ հայտարարվել էր հետախուզում։
Ավելի ուշ ՀՀ ոստիկանության քրեական հետախուզության գլխավոր վարչության աշխատակիցները օպերատիվ տեղեկատվություն էին ստացել Շահինյանի հնարավոր գտնվելու վայրի մասին։ Ռուս գործընկերների հետ իրականացրած համատեղ գործողությունների շնորհիվ Շահինյանը ձերբակալվել էր 2016 թ.–ի փետրվարի 18–ին Օրենբուրգի շրջանի Բուզուլուկ քաղաքում։
Նախօրեին նա հայրենադարձվել էր Հայաստան։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում