ԵՐԵՎԱՆ, 14 հունիսի./Նովոստի-Արմենիա/. Համացանցում հայտնվել է արևելյան մարտարվեստների մեծագույն վարպետ, ամերիկյան և հոնկոնգյան կինոդերասան Բրյուս Լիի իրական մենամարտի միակ տեսանյութը: Տեսանյութը հրապարակվել է YouTube-ի Bruce Lee Central-ում, գրում է
Lenta.ru-ն:
Տեսագրության մեջ Լին մենամարտում է իր աշակերտ Թեդ Վոնի հետ, ով մինչ օրս արևելյան մարտարվեստ է դասավանդում ԱՄՆ-ում: Տեսանյութում երևում է, որ մարտիկները հանդես են գալիս պաշտպանիչ հանդերձանքով: Տեսագրության մեկնաբանության մեջ նշվում է, որ նրանց չէր թույլատրվում մենամարտել առանց այդ հանդերձանքի:
Տեսագրությունն արվել է Կալիֆորնիայի Ջիտ Կուն Դո դպրոցում, որի հիմնադիրն է Բրյուս Լին: Երկու օրում հոլովակը գրեթե 7 մլն դիտում է ունեցել:
Բրյուս Լին (1940-1973) արևելյան մարտարվեստի մեծագույն վարպետներից է, մարտական տեսարանների բեմադրիչ, պրոդյուսեր, սցենարիստ և Ջիտ Կուն Դոյի հիմանդիր: Նա նկարահանվել է ընդհանուր առմամբ 36 ֆիլմում, որոնցից են «Ցասման բռունցքը» (1972 թ.), «Վիշապի ուղին» (1972 թ.), «Վիշապի մուտքը» (1973 թ.) և «Մահվան խաղը» (1973 թ.): Նա մահացել է Քուլուն Տոնգում, 1973 թվականին, 32 տարեկանում «Մահվան խաղը» ֆիլմի նկարահանումների ժամանակ: Մինչ այժմ նրա մահվան իսկական պատճառն անհայտ է: Նրա որդին՝ Բրենդոն Լին, նույնպես դերասան է եղել ու մահացել է նկարահանումների ժամանակ սխալմամբ արձակված ատրճանակի կրակոցից: -0-