Ամերիաբանկը հայտնել է արտերկրում անշարժ գույք ձեռք բերելու համար տրամադրվող ներդրումային վարկերի ծավալի 54% աճի մասին
ԵՐԵՎԱՆ, 13 նոյեմբերի․/Նովոստի–Արմենիա/․ Արտերկրում անշարժ գույք ձեռք բերելու համար Ամերիաբանկի կողմից տրամադրվող ներդրումային վարկերի ծավալն աճել է 54%-ով՝ նախորդ տարվա համեմատ: Ընդ որում, այս ուղղությամբ վարկային պորտֆելը գերազանցել է 20 մլրդ դրամը:
Այս մասին հայտնել է Ամերիաբանկի գրավով ապահովված և ներդրումային վարկերի գծով պրոդուկտ-մենեջեր Գրիգոր Աբաջյանը:
Նրա խոսքով՝ բանկը սկսել է ներդրումային վարկեր տրամադրել 2023 թվականին: Վարկավորման ծավալների աճն Աբաջյանը կապում է արտասահմանյան անշարժ գույքի ձեռքբերման նկատմամբ հաճախորդների հետաքրքրության մեծացման հետ:
Որ երկրներն են հետաքրքրում հաճախորդներին
Աբաջյանի խոսքով՝ բանկի հաճախորդների շրջանում անշարժ գույք ձեռք բերելու առումով ամենամեծ հետաքրքրությունն առաջացնում են Արաբական Միացյալ Էմիրությունները, առաջին հերթին՝ Դուբայը, ինչպես նաև Հունաստանը, Կիպրոսը և Իսպանիան:
«Հենց այս ուղղություններին է բաժին ընկնում հաճախորդների հիմնական հոսքը: Սակայն մենք տրամադրում ենք ֆինանսավորում ցանկացած երկրում անշարժ գույք ձեռք բերելու համար, ևունենք հաճախորդներ, որոնք հետաքրքրված են նաև այլ շուկաներով», — ասել է նա։
Ինչպես նշել է բանկի ներկայացուցիչը, արտասահմանյան անշարժ գույքը հաճախորդները ձեռք են բերում առավելապես ներդրումային նպատակներով, այդ թվում՝ հետագայում վարձակալության հանձնելու համար:
Անշարժ գույքի ձեռքբերման գործընթացն ուղեկցելու համար Ամերիաբանկը համագործակցում է արտասահմանյան անշարժ գույքի գործակալությունների և կառուցապատողների հետ:
Վարկավորման պայմանները և առցանց հաստատումը
Ամերիաբանկի ներդրումային վարկերը տրամադրվում են ՀՀ դրամով, ԱՄՆ դոլարով և եվրոյով:
Բանկի տեղեկատվության համաձայն՝ տարեկան տոկոսադրույքները կազմում են 8.5% եվրոյով վարկերի դեպքում և 9.5%՝ ԱՄՆ դոլարով վարկերի դեպքում:
ՀՀ դրամով վարկերի համար նախատեսված են տարեկան 13.75% տոկոսադրույք՝ առցանց հաստատման դեպքում, և 14%՝ առանց առցանց հաստատման ձևակերպելու դեպքում:
Բացի այդ, բանկը տրամադրում է ներդրումային վարկերի նախնական հաստատման հնարավորություն առցանց ռեժիմում:
«Այսօր մեր հաճախորդները կարող են առցանց ստանալ մինչև 100 հազար դոլար կամ 100 հազար եվրո գումարի չափով վարկի նախնական հաստատում: Դրանից հետո մնացած ընթացակարգերը կարելի է շարունակել բանկի մասնաճյուղում՝ արդեն նախնական հաստատված վարկով», — պարզաբանել է Աբաջյանը:
Նրա խոսքով՝ առցանց նախնական հաստատման ներդրումն ուղղված է վարկերի ձևակերպման ժամանակի կրճատմանը:
Գործարքների իրավաբանական ուղեկցում
Ամերիաբանկը նաև համագործակցում է տարբեր երկրների անշարժ գույքի գործակալությունների և կառուցապատողների հետ, որոնք կարող են հաճախորդներին մատուցել հարակից ծառայություններ անշարժ գույք ձեռք բերելիս:
Ընդ որում, ինչպես հստակեցրել է Աբաջյանը, բանկն ինքը գործարքների իրավաբանական ուղեկցման ծառայություններ չի մատուցում:
«Օրինակ, եթե հաճախորդը ցանկանում է անշարժ գույք ձեռք բերել Հունաստանում, մենք ունենք գործընկերներ, որոնք աշխատում են այդ երկրում և առաջարկում են իրավաբանական խորհրդատվություն և այլ հարակից ծառայություններ», — հայտնել է նա:
Բանկի ներկայացուցչի խոսքով՝ արտասահմանյան գործընկերների հետ համագործակցությունը թույլ է տալիս հաճախորդներին ստանալ խորհրդատվություն անշարժ գույքի ձեռքբերման և համապատասխան գործարքների ձևակերպման հարցերի վերաբերյալ:
