ԵՐԵՎԱՆ, 27 փետրվարի./Նովոստի–Արմենիա/. Ռուսական լոուքոսթեր «Պոբեդա» ընկերությունը, որը մտնում է «Աէրոֆլոտի» խմբի մեջ, թույլտվություն է ստացել չվերթեր իրականացնել դեպի Հայաստան, Մոնտենեգրո և Կիպրոս, հաղորդում է lenta.ru–ն` հղում անելով Ռոսավիացիայի հրամանին։
Ավիացիոն իշխանությունները թույլատրել են փոխադրողին ամենօրյա չվերթեր իրականացնել Մոսկվայից դեպի Պոդգորիցա և Տիվատ (Մոնտենեգրո), ինչպես նաև Լառնակա և Պաֆոս (Կիպրոս)։ Բացի այդ, ընկերությանը թույլատրել են չվերթեր իրակացնել նաև Սոչիից դեպի Երևան: Այդ չվերթերը կիրականացվեն շաբաթը չորս անգամ:
Փետրվարի սկզբին լոուքոսթերի գլխավոր տնօրեն Անդրեյ Կալմիկովն ասել էր, որ ընկերությունը հայտ է ներկայացրել դեպի Պաֆոս և Լառնակա թռիչքներ կատարելու թույլտվություն ստանալու համար: Նշվել էր, որ դեպի Կիպրոս թռիչքները կարող են սկսվել 2016թ.-ի ամռանը:
«Պոբեդա» ավիաընկերությունը հիմնվել է 2014թ.-ի սեպտեմբերին «Դոբրոլյոտ» բյուջետային փոխադրողի փոխարեն, որը նույն տարվա ամռանը դադարեցրել էր թռիչքները Եվրամիության պատժամիջոցների ցուցակում հայտնվելուց հետո, քանի որ թռիչքներ էր իրականացնում դեպի Ղրիմ։ –0–