ԵՐԵՎԱՆ, 6 հունիսի./Նովոստի–Արմենիա/. Կան ֆինանսական սովորություններ, որոնք բացասաբար են ազդում ոչ միայն ընտանեկան բյուջեի, այլև կյանքի որակի վրա։ Եվ դրանցից ավելի լավ է միանգամից ազատվել։ «Նովոստի–Արմենիա»–ն ներկայացնում է 9 վնասակար սովորություն, որոնցից պետք է ազատվել, եթե ուզում եք կարգավորել սեփական ֆինանսական վիճակը։
1. Վաստակածից շատ ծախսել. ինչպես ցույց է տալիս պրակտիկան, որքան շատ ես վաստակում, այնքան ավելի շատ ես ծախսում։ Այդ պատճառով պետք չէ զարմանալ, երբ հանկարծ պարզվում է, որ գումար այլևս չունեք։ Նման իրավիճակում չհայտնվելու համար, հետևեք այս սկզբունքին` տարբեր եկամուտ, միանման ծախսեր։ Եթե սկսել եք ավելի շատ վաստակել, փորձեք նախկինի պես ծախսել, այդ դեպքում կկարողանաք գումար խնայել, որը կարող եք ներդնել բանկային դեպոզիտում կամ որևէ այլ ակտիվում, որոնք կբերեն եկամուտ։
2. Վարկային քարտը համարել բյուջեի մաս. վարկային քարտերը շատ հարմար են ճիշտ օգտագործման դեպքում։ Բայց պետք է հասկանալ, որ վարկային քարտի գումարը եկամտի մաս չէ։ Այն ընդհանրապես ձեր փողը չէ, դա բանկային վարկավորման տեսակ է, որի համար դուք տոկոս եք վճարում։ Այդ պատճառով նախքան վարկային քարտ վերցնելը լավ մտածեք` արդյո՞ք այն չի հանգեցնի ֆինանսական մեծ խնդիրներ։ Եթե, այնուամենայնիվ, որոշել եք օգտվել նման քարտից, ապա ձեզ համար սահմանեք քարտի միջոցների վերադարձի հստակ ժամկետներ և փորձեք չխախտել դրանք։
3. Շտապել ու պարտքերի մեջ խրվել. մի շտապեք բանկից վարկ վերցնել` ցանկալի, բայց ոչ այնքան օգտակար իր գնելու համար։ Ստիպված կլինեք վերադարձնել առնվազն մեկուկես–երկու անգամ ավելի շատ գումար` հաշվի առնելով տոկոսները։ Ավելի ճիշտ կլինի ամսական գումար խնայել ստացված եկամտից և համալրել կուտակային ավանդը։ Այդպես փողը զուր չի ծախսվի, բացի այդ ավանդի մասով տոկոսները կօգնեն ավելի արագ հավաքել անհրաժեշտ գումար ցանկալի իրը գնելու համար։
4. Չհետևել սակագներին. որպես կանոն, դուք սովորաբար քաջատեղյակ եք կոմունալ ծառայությունների սակագների փոփոխության մասին։ Բայց բջջային կապի սակագնի պայմանների փոփոխության վերաբերյալ, գուցե, չգիտեք: Ուստի ավելորդ չի լինի գոնե եռամսյակը մեկ անգամ մուտք գործել ծառայությունների մատուցմամբ զբաղվող ընկերությունների կայքեր։ Այստեղ կարևոր է նաև պարբերաբար համեմատել առկա սակագինը շուկայի այլ առաջարկների հետ և չվախենալ ընտրություն կատարել հօգուտ նորի, բայց ձեզ համար ավելի շահավետ տարբերակի:
5. Չհետևել բաժանորդագրություններին. մեզնից շատերը գնում են բջջային հավելվածներ կամ բաժանորդագրվում են որոշակի ծառայությունների: Եթե նման գնումը մեկանգամյա է և որոշակի ժամանակ անց ավտոմատ կերպով չի երկարացվում, ապա կարող եք հանգիստ լինել: Այնուամենայնիվ, որոշ դեպքերում անհրաժեշտ է վճարել հավելվածն օգտագործելու համար ամեն տարի, ամիս կամ նույնիսկ շաբաթը մեկ անգամ: Հետևաբար, ստուգեք, թե առաջիկայում որ բաժանորդագրությունների մասով վճարումներ ունեք, և հաջորդ ծառայությունը գնելուց հետո դրա ավարտից մի քանի օր առաջ գրառում կատարեք օրագրում, որպեսզի անհրաժեշտության դեպքում ժամանակ ունենաք և հրաժարվեք բաժանորդագրությունից:
6. Շարունակել վճարել անպետք ֆինանսական պրոդուկտների համար. նույնիսկ «հավելյալ» դեբետային քարտը տարեկան որոշակի գումար է «պոկում» ձեր բյուջեից (չհաշված SMS հաղորդագրության վճարը): Իսկ եթե ձեր դրամապանակում մի քանի նման քարտ կա, ապա այդ ամենը բավականին մեծ բեռ է դառնում։ Հետևաբար, պետք է պարբերաբար ստուգել դրամապանակը և հրաժարվել ավելորդ ֆինանսական պրոդուկտներից:
7. Անտեսել զեղչերը. վատ սովորություն է նաև, երբ չեք ցանկանում հետևել ակցիաներին: Ժամանակակից աշխարհում ապրանքների և ծառայությունների արտադրողների միջև մրցակցությունն այնքան մեծ է, որ հաճախ հաճախորդին գրավելու կամ պահելու համար արտադրողները ներդնում են նոր ծառայություններ: Մասնավորապես, նրանք կարող են մեկ անգամ նվազեցնել արժեքը, կամ առաջարկել անվճար առաքում։ Մի ամաչեք և հարցրեք զեղչերի մասին, հատկապես երբ առաջին անգամ եք պատվիրում, ինչպես նաև այն խանութում, որտեղ դուք սիրելի հաճախորդ եք: Միաժամանակ, մի մոռացեք առցանց խանութների մասին` զեղչերը կամ շահավետ ակցիաների շաբաթը բաց չթողնելու համար։
8. Չհետաքրքրվել բոնուսներով. կարող է լինել անվճար այցելություն SPA-սրահ կոնկրետ ցանցային խանութի քարտով կամ հավելյալ զեղչ հագուստի խանութի զեղչի քարտով, որը դուք միշտ մոռանում եք տանը: Կարող են լինել նաև «թաքնված» բոնուսներ և քեշբեքեր բանկային պրոդուկտների մասով: Օրինակ՝ անվճար ապահովագրություն արտասահման մեկնողների համար կամ հավատարմության ծրագիր, որին կարելի է լրացուցիչ միանալ։
9. Չպահպանել վճարային կարգապահություն. երբեմն թվում է, որ ոչ մի վատ բան չի պատահի, եթե մեկ-երկու-երեք օր ուշ վճարեք հաշիվները կամ մարեք վարկը: Սակայն, վճարման ժամկետները չպահելու դեպքում հաշվարկվում են տույժեր, տուգանքներ և այլ պատժամիջոցներ, որոնք մեծացնում են ծախսերը: Բացի այդ, վարկային պատմությունը վատանում է։ Կազմեք վճարումների օրացույց: Շատ օգտակար ծառայություն է «ավտովճարումը», որն այժմ տրամադրում են բոլոր բանկերը: Այս դեպքում դուք չեք մոռանա վճարել այս կամ այն հաշիվը կամ անդորրագիրը։
Ամփոփում
Ֆինանսական պլանը կօգնի ազատվել վնասակար ֆինանսական սովորություններից։ Հստակ հետևելով պլանին` դուք կկարողանաք գիտակցաբար վերաբերվել սեփական ֆինանսներին։ Մաղթում ենք հաջողություն։
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-
