«Ոսկե ծիրանը»` բարձր ճաշակի և մարդասիրության գաղափարների կրող

ԵՐԵՎԱՆ, 14 հուլիսի. /Նովոստի–Արմենիա/. «Ոսկե ծիրան» կինոփառատոնը դարձել է բարձր ճաշակի, ճշմարիտ արվեստի, ինչպես նաև խաղաղասիրության ու մարդասիրության գաղափարների կրող և մունետիկ, նշել է Հայաստանի նախագահ Սերժ Սարգսյանը։

Նախօրեի երեկոյան նա հանդիպել է «Ոսկե ծիրան» 14–րդ միջազգային կինոփառատոնի պատվավոր հյուրերի և փառատոնի մասնակից կինոգործիչների հետ։



Փառատոնի մասնակիցները զրուցել են նախագագի հետ «Ոսկե ծիրանի» անցած ուղու, ձեռքբերումների, ինչպես նաև այս տարվա մրցութային ծրագրերի մասին։

«Ողջունում եմ «Ոսկե ծիրան» 14-րդ միջազգային կինոփառատոնի մասնակիցներին, հյուրերին և առանձնահատուկ շնորհակալություն հայտնում կազմակերպիչներին, որոնք հետևողականությամբ և նվիրվածությամբ ամեն տարի Երևանի և մայրաքաղաքի հյուրերի համար արարում են այս սպասված տոնը»,– նշվում է նախագահի ուղերձում։

Նրա խոսքով, հայկական ամենահեղինակավոր կինոփառատոնը ոչ միայն հաճելի պահեր է պարգևում մեր հանդիսատեսներին, այլև կարևոր ուսուցողական նշանակություն ունի երիտասարդ արվեստագետների համար՝ գեղագիտական և աշխարհայացքային աճի տեսանկյունից:

«Այս փառատոնը նաև կոչված է ստեղծելու համապատասխան հոգևոր-մշակութային միջավայր և մթնոլորտ, առանց որոնց դժվար է պատկերացնել ստեղծագործական թռիչքներ:


Գոհունակությամբ ենք արձանագրում «Ոսկե ծիրանի» հավատարմությունը հայկական կինոյի պատմությանը և ավանդույթներին: Մեր դասական ժառանգությունը և ժամանակակից գործերը կարիք ունեն հանրահռչակման: Հայկական կինոարվեստը մենք մշտապես պետք է քննենք և դիտարկենք համաշխարհային և միջազգային համատեքստում»,– ասվում է ուղերձում։

Սարգսյանը նշել է, որ հայկական կինոարվեստն անհրաժեշտ է ուսումնասիրել և դիտարկել համաշխարհային և միջազգային համատեքստում։

«Նովոստի–Արմենիա» գործակալությունը փառատոնի տեղեկատվական հովանավորն է։ -0-