ԵՐԵՎԱՆ, 13 ապրիլի. /Նովոստի-Արմենիա/. Ամերիկահայ գործարար, Reddit հարթակի հիմնադիրներից մեկը` Ալեքսիս Օհանյանը ևս միացել է հոլիվուդյան «Խոստումը» (The Promise) ֆիլմի պրոմո-արշավին:
«Հուսանք, որ այս էպիկական ֆիլմը կբարձրացնի իրազեկվածությունը և կնպաստի Հայոց ցեղասպանության ճանաչմանը», - գրել է Օհանյանը Facebook-յան իր էջում Լոս Անջելեսում կայացած ֆիլմի փակ պրեմիերայից հետո:
Նա շնորհակալություն է հայտնել ֆիլմի համար ամերիկահայ գործարար, միլիարդատեր Քըրք Քըրքորյանին (մահացել է 2015 թ.-ին) և ֆիլմի պրոդյուսեր Էրիկ Էսրաիլյանին:
«Պատիվ եմ համարում ներկա գտնվել ֆիլմի լոսանջելեսյան ցուցադրությանը իմ հերոսներից մեկի` 95-ամյա պապիկիս Ջոն Օհանյանի հետ», - գրել է Օհանյանը:
Նա բարգավաճում է մաղթել աշխարհասփյուռ հայ ժողովրդին: «Նրանք չկարողացան ոչնչացնել մեզ և չեն ստիպի լռել», - գրել է Օհանյանը:
«Խոստումը» դրամայի համաշխարհային պրեմիերան տեղի է կունենա ապրիլի 21-ին, իսկ Հայաստանում` ապրիլի 27-ին:
Ֆիլմը ներկայացնում է Հայոց ցեղասպանության տարիներին տեղի ունեցած սիրո պատմություն:
Ֆիլմի ռեժիսորն է Թերի Ջորջը: Ֆիլմի սցենարի հեղինակն է Ռոբին Սվայկորդը:
Ֆիլմի գլխավոր դերակատարներն են աշխարհահռչակ դերասաններ Քրիստիան Բեյլը, Օսկար Այզեքը և Շառլոտա Լը Բոնը: Ֆիլմում նկարահանվել են նաև ֆրանսիացի աստղ Ժան Ռենոն, ինչպես նաև Ջեյմս Քրոմվելը և Անժելա Սարաֆյանը:
Ֆիլմը նկարահանվել է ամերիկահայ միլիարդատեր Քըրք Քրքորյանի ֆինանսական աջակցությամբ, ով հեռացել է կյանքից 2015 թ.–ին։
Ֆիլմի գլխավոր հերոսներն են ուսանող-բժիշկ Միքայել Պողոսյանը (Օսկար Այզեքը), ֆոտոլրագրող Քրիս Մայերը (Քրիստիան Բեյլ), ով ժամանել է Օսմանյան կայսրություն՝ լուսաբանելու աշխարհաքաղաքական իրադարձությունները և Փարիզում սովորող հայ նկարչուհի Աննան (Շառլոտա Լը Բոն): Բովանդակությունը կառուցված է նրանց սիրային եռանկյան շուրջ Օսմանյան կայսրությունում Հայոց ցեղասպանության տարիներին: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
