Փիթեր Բալաքյանն արժանացել է հեղինակավոր Պուլիտցերյան մրցանակի

ԵՐԵՎԱՆ, 19 ապրիլի. /Նովոստի–Արմենիա/. Ամերիկահայ հայտնի գրող և բանաստեղծ Փիթեր Բալաքյանն արժանացել է Պուլիտցերյան մրցանակի «Պոեզիա» անվանակարգում։ Ինչպես ասվում է ամերիկյան այդ հեղինակավոր պարգևի կայքում, Բալաքյանը մրցանակը ստացել է «Օզոնային օրագիր» պոեմի համար։

Բալաքյանը մի շարք ժողովածուների «Լույսի թախծոտ օրեր», «Պատասխան Վիլդերնես կղզուց», «Ճակատագրի սև շունը», «Այրվող Վագր. Հայոց ցեղասպանությունը և Ամերիկայի պատասխանատվությունը» վեպի և այլ ստեղծագործությունների հեղինակ է։

Բալաքյանը բանասիրական գիտությունների դոկտոր է, պրոֆեսոր, Հայաստանի գիտությունների ազգային ակադեմիայի պատվավոր դոկտոր, Հայաստանի գրողների միության պատվավոր անդամ, պարգևատրվել է «Մովսես Խորենացի» մեդալով։

Պուլիտցերյան մրցանակի դափնեկիրների հայտարարման 100–րդ արարողությունն անցկացվել է նախօրեին Կոլումբիայի համալսարանում։

Պուլիտցերյան մրցանակն ամերիկյան պարգև է, որը շնորհվում է գրականության, լրագրության, երաժշտության և թատրոնի բնագավառում ունեցած ձեռքբերումների համար։ Այն հիմնել է հունգարահրեա մագնատ Ջոզեֆ Պուլիտցերը։ Մրցանակը 1917 թվականից ամեն տարի հանձնում են Կոլումբիական համալսարանի հոգաբարձուները, այն կազմում է 10 հազար դոլար։ --0--