ԵՐԵՎԱՆ, 27 հունիսի. /Նովոստի-Արմենիա/. «Օդեսան ընթերցում է։ Օդեսային ընթերցում են» աշխարհում առաջին գրական ֆլեշմոբը կանցկացվի հուլիսի 12–ին Օդեսայում։
Ֆլեշմոբի ընթացքում հազարավոր մարդիկ միաժամանակ կընթերցեն օդեսցի գրողների ստեղծագործությունների հատվածներ։
Ինչպես «Նովոստի–Արմենիա» գործակալությանը հայտնեց նախագծի հեղինակներից մեկը` էստոնացի գործարար Մեէլիս Կուբիտսը, ֆլեշմոբի նպատակն ընթերցանության զանգվածայնացումն է, օդեսցի գրողներին աշխարհին ներկայացնելը և Օդեսայի` բազմամշակութային լինելը ցույց տալը։
«Գործողությունը կշարունակվի մոտ երեսուն րոպե` հարյուրավոր, նույնիսկ հազարավոր մարդիկ Օդեսայի փողոցներում տարբեր լեզուներով միաժամանակ կկարդան օդեսցի գրողների ստեղծագործությունների հատվածներ»,– ասաց Կուբիտսը։
Նրա խոսքով, այս պահին նախագծին միացել են ավելի քան 20 լեզուների կրողներ, բայց հեռանկարում կարող են ավելի շատ լինել, չէ՞ որ, օրինակ, Իլֆ և Պետրովի «12 աթոռ» վեպը թարգմանվել է ավելի քան վեց տասնյակ լեզուներով։
Արդեն հիմա հայտնի է, որ «Օդեսային ընթերցելու են» ուկրաիներեն, ռուսերեն, մոլդովերեն, հայերեն, անգլերեն, գերմաներեն, ֆրանսերեն, վրացերեն, էստոներեն, իսպաներեն, լիտվերեն, հունարեն և այլ լեզուներով։ Ընդ որում` կհնչեն հատվածներ ոչ միայն նախորդ դարի, այլ նաև ժամանակակից գրողների ստեղծագործություններից։
«Ամենակարևորը, թերևս, այն է, որ Օդեսան Երկիր մոլորակի վրա լավագույն վայրն է նման միջոցառում անցկացնելու համար։ Այստեղ իրենց քաղաքը սիրող մարդկանց կրիտիկական զանգված է հավաքված և, ինչպես ասում են, կարդալու բան կա»,– ասաց Կուբիտսը։
Նա նշեց, որ քաղաքային իշխանությունների վերաբերմունքը նմանատիպ միջոցառումների անկացման նկատմամբ միշտ դրական է եղել։ Նախագծի հեղինակն ավելացրեց, որ միջոցառմանը գրանցվել պետք չէ` բավական է վերցնել օդեսցի գրողի սիրած գիրքը ցանկացած լեզվով։
Ակցիան անցկացնում են` Օդեսցիների համաշխարհային ակումբը, Օդեսայի գրական թանգարանը, քաղաքային և տեղի ինքնակառավարման մարմինները։ Ֆլեշմոբին ներկա կլինեն հայտնի օդեսցիներ, քաղաքի բարեկամներ, լրագրողներ տարբեր երկրներից և օդեսցի գրողներ, դերասաններ, երաժիշտներ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
