Համացանցում կայացել է «Նոր ալիք 2017» մրցույթի հայազգի մասնակցի երգի պրեմիերան (ՎԻԴԵՈ)

ԵՐԵՎԱՆ, 25 օգոստոսի. /Նովոստի–Արմենիա/. Կայացել է «Նոր ալիք -2017» մրցույթի հայ մասնակից Սյուզաննա Մելքոնյանի երգի պրեմիերան:

«Навсегда» («Ընդմիշտ») երգի հեղինակը երգչուհու երաժշտական պրոդյուսեր Շուշան Սարգսյանն է։ Ինչպես հինգշաբթի լրագրողների հետ հանդիպման ընթացքում ասել էր Սարգսյանը, երգը գրվել է ռուսերեն, քանի որ այդպես այն ավելի մոտ կլինի ռուս հանդիսատեսին։

Սյուզաննա Մելքոնյանը հայտնի է հայ հանդիսատեսին տարբեր երաժշտական նախագծերով, որոնցից են «Հայ սուպերսթարը», «X factor»–ը։ Սակայն Մելքոնյանը մեծ ճանաչում ձեռք բերեց` մասնակցելով «Դեպի Եվրատեսիլ» նախագծին, որտեղ երգչուհուն հաջողվեց հասնել եզրափակիչ։
«Նոր ալիք 2017» մրցույթի եզրափակիչը կանցկացվի սեպտեմբերի 8–17–ը Սոչիում։ Այս տարի «Նոր ալիք» մրցույթի եզրափակիչ են դուրս եկել 14 մասնակիցներ։ Նրանք ներկայացնում են 9 երկիր` Հայաստանը, Վիետնամը, Ղազախստանը, Մոլդովան, Ռումինիան, Ռուսաստանը, Ուզբեկստանը, Ուկրաինան և Շվեդիան։–0–