ԵՐԵՎԱՆ, 17 նոյեմբերի. /Նովոստի–Արմենիա/. Թատրոնի միջազգային ինստիտուտի համաշխարհային XXXIV կոնգրեսն է մեկնարկել երկուշաբթի Երևանում։
Հայաստանում նմանատիպ միջոցառումն անցկացվում է առաջին անգամ։ Մշակույթի փոխնախարար Արթուր Պողոսյանի խոսքով` կոնգրեսի անցկացումը (նոյեմբերի 17-22–ը) նշանակալի իրադարձություն է երկրի մշակութային կյանքի համար։
«Մեզ համար մեծ պատիվ է, որ հենց Հայաստանն է այս տարի ընտրվել որպես Համաշխարհային կոնգրեսի անցկացման վայր։ Մեզ մոտ է ժամանել 300 պատվիրակ աշխարհի 100 երկրներից։ Կարծում եմ, որ կոնգրեսը կնպաստի տարբեր երկրների թատերական գործիչների միջև փորձի փոխանակմանը»,– երկուշաբթի մամուլի ասուլիսում ասաց Պողոսյանը։
Հայաստանում ԹՄԻ Կենտրոնի նախագահ Հակոբ Ղազանչյանն իր հերթին նշեց, որ հենց Հայաստանում միջոցառումն անցկացնելու համար մեծ ջանքեր են գործադրվել։ «Մենք շնորհակալ ենք, որ բազմաթիվ հավակնորդ երկրներից ընտրվել է հենց մեր երկիրը»,– ավելացրեց նա։
ԹՄԻ գլխավոր տնօրեն Տոբիաս Բյանկոնեն հայտարարեց, որ Հայաստանում միջոցառումն անցկացնելու որոշումն ընդունվել է երկրի` խոսքի ազատությանը հավատարիմ լինելու սկզբունքից ելնելով։
«Մենք ունեինք մի շարք հավակնորդներ, այդ թվում` Ադրբեջանը։ Սակայն ընտրեցինք Հայաստանը, քանի որ այստեղ պահպանվում է խոսքի ազատությունը, ինչը շատ կարևոր է մեզ համար։ Մենք ընտրություն կատարեցինք ոչ թե հօգուտ փողերի, այլ հօգուտ մի երկրի, որտեղ գնահատվում է թատրոնը»,– ասաց Բյանկոնեն։
Թատրոնի միջազգային ինստիտուտը 1948 թվականին ստեղծված թատերական կազմակերպություն է, որի նպատակը թատերային գործիչների միջև միջազգային կապերի խրախուսումն է` թատրոնի տեսության և պրակտիկայի ուսումնասիրության շահերից ելնելով։ ԹՄԻ–ն իր գործունեությունն իրականացնում է ՅՈՒՆԵՍԿՕ–ի հետ համագործակցությամբ։
ԹՄԻ համաշխարհային կոնգրեսն անցկացվում է երկու տարին մեկ անգամ։ Այս տարի կոնգրեսի թեման է` «Նոր ձայներ, նոր հանդիսատես. Ժամանակն է երկխոսության»։
Կոնգրեսի շրջանակում Երևանում կկազմակերպվեն մի շարք միջոցառումներ, այդ թվում` հանդիպումներ թատերական գործիչների հետ, բեմադրություններ, քննարկումներ, վարպետության դասեր, շնորհանդեսներ։ -0-
