ԵՐԵՎԱՆ, 8 օգոստոսի. /Նովոստի–Արմենիա/. Լեոնիդ Ենգիբարյանի անվան մնջախաղի չորրորդ միջազգային փառատոնը կմեկնարկի օգոստոսի 10–ին Ծաղկաձոր առողջարանային քաղաքում, ուրբաթ «Նովոստի» միջազգային մամուլի կենտրոնում հայտնեց փառատոնի գործադիր տնօրեն, Երևանի մնջախաղի պետական թատրոնի գեղարվեստական ղեկավար Ժիրայր Դադասյանը։
«Մենք շատ ուրախ ենք, որ մեր փառատոնն արժանի տեղ է զբաղեցրել միջազգային փառատոների շարքում, և փառատոնի նկատմամբ հետաքրքրություն են հայտնում տարբեր երկրների կոլեկտիվներ։ Փառատոնը ավանդաբար կանցկացվի Ծաղկաձորում, կմեկնարկի օգոստոսի 10-ին և կավարտվի 15–ին»,– ասաց Դադասյանը։ Ըստ նրա, այս տարի ելույթ կունենան Հայաստանի, Իրանի, Գերմանիայի, Ֆրանսիայի, Ճապոնիայի և Թաիլանդի արտիստները։
«Ավելի վաղ ծրագրվում էր, որ այս տարի փառատոնին կմիանան նաև արտիստներ Իսպանիայից և Վրաստանից, սակայն վերջին պահին նրանք խնդիրներ ունեցան և չեն մասնակցի մեր փառատոնին»,– ասաց փառատոնի տնօրենը։ Դադասյանն ավելացրեց, որ փառատոնի ծրագիրը բազմազան է լինում։ Մասնավորապես, փառատոնին կմասնակցեն` ճապոնացի հայտնի դերասան Մակոտո Ինոուեն, կատակերգուների ինտերակտիվ դուետը Թաիլանդից, արտիստներ Իրանից, ովքեր առաջին անգամ կժամանեն Հայաստան` փիլիսոփայական ներկայացումով, ֆրանսիացի միմոսը` հետաքրքիր և յուրահատուկ ծրագրով, կատակերգուների դուետը Գերմանիայից։
«Տարեցտարի մեր հանդիսատեսի մակարդակն ավելի է բարձրանում, և դա շատ կարևոր է մեզ համար, քանի որ մենք աշխարհին ենք ներկայացնում հայկական մշակույթը»,– ավելացրեց Դադասյանը։
Փառատոնի տնօրենը հայտնեց, որ ինչպես նախորդ տարի, այս տարի նույնպես փառատոնն անցկացնելու համար պետությունը 8 մլն դրամ (19,3 հազար դոլար) է հատկացրել։
Առաջին անգամ Մնջախաղի միջազգային փառատոնն անցկացվել է 2008 թվականին, իսկ 2010 թվականից կրում է Լեոնիդ Ենգիբարյանի անունը։
Փառատոնի անցկացմանն օժանդակում է Հայաստանի մշակույթի նախարարությունը։
«Նովոստի–Արմենիա» գործակալությունը փառատոնի տեղեկատվական հովանավորն է։ -0-
