ԵՐԵՎԱՆ, 26 հունիսի. /Նովոստի-Արմենիա/. Աշխարհահռչակ ջազ-երգչուհի Տաթևիկ Հովհաննիսյանը (Datevik Hovanesian) ոգեշնչված է Ստեփանակերտում հուլիսի 2-ին կայանալիք համերգով:
«Վաղուց չեմ եղել Ղարաբաղում և սկզբից Ստեփանակերտում համերգ ունենալու առաջարկն ընդունեցի առանց հատուկ ոգևորության՝ հաշվի առնելով Երևանից մինչև ԼՂՀ վեցժամյա ճանապարհը: Սակայն իմ ամուսինը հիշեցրեց ինձ, թե ինչ հիանալի է Ղարաբաղը, և ես հիմա ոգևորությամբ սպասում եմ համերգին», - ասել է երգչուհին Երևանում կայացած մամուլի ասուլիսի ժամանակ:
Նրա խոսքերով՝ սա կլինի իր առաջին համերգը ԼՂՀ-ում երաժշտական գործունեության ողջ պատմության ընթացքում:
Հունիսի 28-ին երգչուհին համերգ կտա Երևանի Yans Music Hall-ում, հունիսի 30-ին՝ Գյումրու դրամատիկական թատրոնում:
Հայաստանում և ԼՂՀ-ում Հովհաննիսյանի համերգային շրջագայությունը կավարտվի հուլիսի 4-ին Երևանում` Սպենդիարյանի անվան օպերայի և բալետի ազգային ակադեմիական թատրոնում կայանալիք համերգով:
Տաթևիկ Հովհաննիսյանը մեծացել է երաժիշտների ընտանիքում, փոքր տարիքում կատարել է հայկական ժողովրդական երգեր, այնուհետև հետաքրքրվել է ջազով: 1966 թ.-ին երգել է Հայկական ռադիո գազ-նվագախմբի հետ: 1974 թ.-ին երգչուհին ավարտել է Մելիքյանի անվան երաժշտական ուսումնարանի դիրիժորա-երգչախմբային բաժինը:
1974–1978 թթ.-ին երգել է Հայաստանի Կոնստանտին Օրբելյանի պետական էստրադային նվագախմբում (1976 թ.-ին ելույթ է ունեցել Բելգրադում կայացած ջազի փառատոնին): 1977 թ.-ից հետո Հովհաննիսյանը մի քանի ջազային ծրագրեր է պատրաստել Իգոր Բրիլի, Տիյիտ Պաուլսի, Գունարս Ռոզենբերգի համույթների, դաշնակահար Միքայել Զաքարյանի հետ: Ելույթ է ունեցել բազմաթիվ հայկական փառատոններում:
1991 թ.-ին երգչուհին տեղափոխվել է ԱՄՆ, իսկ տասնամյակի վերջում սկսել է համերգնել տալ Ամերիկայում և Եվրոպայում Datevik անունով: -0-
